Alternative flash content

To view this Flash you need Javascript on your browser and updated version of flash player.

Get Adobe Flash player

ແນະນຳ ກ.ວ.ຕ (MOST)

ລົງທະບຽນຜູ້ໃຊ້



Home ຂ່າວສານ ກອງປະຊຸມ-ສຳມະນາ ສຳມະນາການພັດທະນາເຕັກໂນໂລຊີດິຈິຕ໋ອນ ຍຸກອຸດສາຫະກໍາ 4.0

ສຳມະນາການພັດທະນາເຕັກໂນໂລຊີດິຈິຕ໋ອນ ຍຸກອຸດສາຫະກໍາ 4.0

128ວັນທີ 4 ພຶດສະພາ 2018 ທີ່ຜ່ານມາ ກົມເຕັກໂນໂລຊີ ດິຈິຕ໋ອນ, ກະຊວງວິທະຍາສາດ ແລະ ເຕັກໂນໂລຊີ

ຈັດກອງປະຊຸມສຳມະນາໃນຫົວຂໍ້: Blockchain ແລະ ການພັດທະນາເຕັກໂນໂລຊີ ດິຈິຕ໋ອນ ຂອງຍຸກອຸດສາຫະກໍາ 4.0” ພາຍໃຕ້ການເປັນປະທານຂອງທ່ານ ແກ້ວນະຄອນ ໄຊສຸລຽນ, ຫົວໜ້າກົມເຕັກໂນໂລຊີ ດິຈິຕ໋ອນ, ມີຜູ້ຕາງໜ້າຈາກບັນດາກະຊວງ ແລະ ພາກສ່ວນກ່ຽວຂ້ອງເຂົ້າຮ່ວມ.

ໃນການສໍາມະນາດັ່ງກ່າວຜູ້ເຂົ້າຮ່ວມ ໄດ້ຮັບຟັງການນໍາສະເໜີກ່ຽວກັບການບໍລິຫານຂໍ້ມູນໃນ ເຕັກໂນໂລຊີ Blockchain,  ຊຶ່ງເປັນເຕັກໂນໂລຊີໜຶ່ງທີ່ພົ້ນເດັ່ນໃນປະຈຸບັນ ແລະ ການຈະນຳເອົາເຕັກໂນໂລຊີດັ່ງກ່າວນີ້ສາມາດໝູນໃຊ້ເຂົ້າໃນວຽກງານຂອງຂະແໜງຕ່າງໆ ຈາກທາງຊ່ຽວຊານຂອງອົງການ KOICA ທ່ານ SON JONG HAI ທີ່ປຶກສາອາວຸໂສດ້ານໄອທີ ປະຈໍາ ກົມເຕັກໂນໂລຊີ ດິຈິຕ໋ອນ

ນອກຈາກນັ້ນ, ຍັງໄດ້ຮັບຟັງການນໍາສະເໜີ ກ່ຽວກັບຜະລິດຕະພັນ ແລະ ຜົນງານການຄົ້ນຄວ້າ-ພັດທະນາຊອບແວ ຂອງກົມເຕັກໂນໂລຊີດິຈິຕ໋ອນ ຊຶ່ງໄລຍະຜ່ານມາທາງກົມໄດ້ມີການພັດທະນາຊອບແວຈໍານວນໜຶ່ງ ອອກຮັບໃຊ້ສັງຄົມ ເປັນຕົ້ນ ໂປຣແກມຄຸ້ມຄອງຂໍ້ມູນຊັບສິນ, ໂປຣແກມຄຸ້ມຄອງເອກະສານຂາເຂົ້າ-ຂາອອກ, ໂປຣແກມຄຸ້ມຄອງພະນັກງານ, ໂປຣແກມນັບຄະແນນສຽງເລືອກຕັ້ງ, ລະບົບກອງປະຊຸມທາງໄກ, ລະບົບຄຸ້ມຄອງ-ບໍລິຫານຫໍສະໝຸດ ແລະ ການນໍາສະເໜີ ກ່ຽວກັບການໃຫ້ບໍລິການ ແລະ ການນໍາໃຊ້ “ສູນຂໍ້ມູນດິຈິຕ໋ອນ” (Digital Data Center) ຂອງກະຊວງວິທະຍາສາດ ແລະ ເຕັກໂນໂລຊີ ຊຶ່ງສູນດັ່ງກ່າວຖືກສ້າງຕັ້ງຂຶ້ນ ເພື່ອບໍລິການຮັບໃຊ້ທົ່ວສັງຄົມ ໂດຍສະເພາະແມ່ນພາກລັດ ໃນການຫັນການຄຸ້ມຄອງ-ບໍລິຫານ ເປັນທັນສະໄໝ ເພື່ອພັດທະນາເສດຖະກິດ-ສັງຄົມ ຂອງ ສປປ ລາວ.

ທ່ານ ແກ້ວນະຄອນ ໄຊສຸລຽນ ກ່າວວ່າ: ໃນໄລຍະຫຼາຍປີຜ່ານມານີ້ ທົ່ວໂລກໄດ້ມີການເວົ້າເຖິງການປະຕິວັດອຸດສາຫະກໍາຄັ້ງທີ 4 ຫຼື ຍຸກອຸດສາຫະກໍາ 4.0 ຊຶ່ງໝາຍເຖິງຂະບວນການປ່ຽນແປງທາງດ້ານວິທີການຜະລິດ ແລະ ລະບົບການຜະລິດຈາກຮູບແບບເກົ່າໄປສູ່ຮູບແບບໃໝ່ ດ້ວຍການນໍາໃຊ້ເຕັກໂນໂລຊີດິຈິຕ໋ອນ ແລະ ອິນເຕີເນັດ ເຂົ້າໃນຂະບວນການຜະລິດສິນຄ້າ ເພື່ອເພີ່ມປະສິດທິພາບຂອງຂະບວນການຜະລິດໃຫ້ສູງຂຶ້ນກວ່າເກົ່າ ແລະ ເຮັດໃຫ້ສິນຄ້າທີ່ຜະລິດອອກມາ ສາມາດຕອບສະໜອງຕາມຄວາມຮຽກຮ້ອງຕ້ອງການຂອງຜູ້ບໍລິໂພກໄດ້ຢ່າງແທ້ຈິງ ຊຶ່ງບັນດານະວັດຕະກໍາທີ່ພົ້ນເດັ່ນໃນຍຸກອຸດສາຫະກໍາ 4.0 ນີ້ ບັນດາທ່ານກໍອາດຈະເຄີຍໄດ້ຍິນຜ່ານມາແລ້ວ ເຊັ່ນ: Internet of Things (IoT) ການເຊື່ອມຕໍ່ອິນເຕີເນັດຂອງອຸປະກອນທີ່ເຮັດເປັນອຸປະກອນອັດສະລິຍະ, Artificial Intelligence (AI) ປັນຍາປະດິດ ທີ່ໃຊ້ເຂົ້າໃນການສ້າງຫຸ່ນຍົນອັດຕະໂນມັດມາຮັບໃຊ້ການຜະລິດ, Cloud Computing ການປະມວນຜົນ ແລະ ເກັບຮັກສາຂໍ້ມູນຜ່ານລະບົບອອນໄລ, Big Data, ເຕັກໂນໂລຊີຈັດເກັບຂໍ້ມູນແບບ Blockchain ແລະ ອື່ນໆ. ດັ່ງນັ້ນ, ໃນຍຸກໂລກາພິວັດນີ້ ພວກເຮົາສາມາດເຫັນໄດ້ແຈ້ງວ່າ ການພັດທະນາທາງດ້ານເຕັກໂນໂລຊີດິຈິຕ໋ອນ ແມ່ນມີການຂະຫຍາຍຕົວຢ່າງວ່ອງໄວ ແລະ ບັນດາປະເທດທີ່ພັດທະນາແລ້ວ ແມ່ນໄດ້ຖືເອົາວຽກງານການຄົ້ນຄ້ວາ-ພັດທະນາ ແລະ ການສົ່ງເສີມ ການນຳໃຊ້ເຕັກໂນໂລຊີດິຈິຕ໋ອນ ເປັນບັນຫາສຳຄັນໃນການພັດທະນາເສດຖະກິດ-ສັງຄົມ. ຕໍ່ກັບສະພາບການດັ່ງກ່າວນີ້ ສປປ ລາວ ຂອງພວກເຮົາ ຈຶ່ງມີຄວາມຈໍາເປັນຕ້ອງຮີບດ່ວນນໍາເອົາເຕັກໂນໂລຊີດີຈີຕອນ ມາເປັນເຄື່ອງມືສໍາຄັນໃນການກະຕຸກຊຸກຍູ້ ແລະ ຂັບເຄື່ອນການພັດທະນາປະເທດຊາດ ຊຶ່ງເຕັກໂນໂລຊີ ດິຈິຕ໋ອນ ສາມາດຕອບໂຈດ ຫຼື ແກ້ໄຂບັນຫາສິ່ງທ້າທາຍຕ່າງໆທີ່ປະເທດເຮົາກໍາລັງພົບພໍ້ຢູ່ໃນປະຈຸບັນ ຫຼື ອາດຈະເພີ່ມໂອກາດໃນການພັດທະນາເສດຖະກິດ-ສັງຄົມ ເປັນຕົ້ນ ການປັບປຸງກົນໄກການຄຸ້ມຄອງບໍລິຫານລັດ ໃຫ້ມີຄວາມສະດວກ ວ່ອງໄວ ໂປງໃສ ສາມາດກວດສອບໄດ້, ການພັດທະນາຂີດຄວາມສາມາດຂອງຫົວໜ່ວຍທຸລະກິດພາຍໃນປະເທດ ໂດຍສະເພາະໃນກຸ່ມວິສະຫະກິດຂະໜາດນ້ອຍ ແລະ ກາງ ໃຫ້ສາມາດແຂ່ງຂັນໃນໂລກສະໄໝໃໝ່ໄດ້.

ໃນກອງປະຊຸມສຳມະນາດັ່ງກ່າວ, ຜູ້ເຂົ້າຮ່ວມຍັງໄດ້ປະກອບຄຳຄິດຄຳເຫັນ, ແລກປ່ຽນບົດຮຽນ ໃນຫົວຂໍ້ຕ່າງໆ. ກອງປະຊຸມດັ່ງກ່າວໄດ້ປິດລົງໃນ ຕອນບ່າຍຂອງວັນດຽວກັນ.

ພາບ ແລະ ຂ່າວ: ບຸນທັນ ນັນທະວົງ

127129125131130124