Alternative flash content

To view this Flash you need Javascript on your browser and updated version of flash player.

Get Adobe Flash player

ແນະນຳ ກ.ວ.ຕ (MOST)

ລົງທະບຽນຜູ້ໃຊ້



Home ຂ່າວສານ ຂ່າວສານ ການພົວພັນ ແລະ ຮ່ວມມື ເຕັກໂນໂລຊີ ລາວ-ຈີນ ຮ່ວມມືທາງດ້ານວິທະຍາສາດ ແລະ ເຕັກໂນໂລຊີ ພາຍໃຕ້ຍຸດທະສາດ “ໜຶ່ງແລວ ໜຶ່ງເສັ້ນທາງ

ລາວ-ຈີນ ຮ່ວມມືທາງດ້ານວິທະຍາສາດ ແລະ ເຕັກໂນໂລຊີ ພາຍໃຕ້ຍຸດທະສາດ “ໜຶ່ງແລວ ໜຶ່ງເສັ້ນທາງ

altກະຊວງວິທະຍາສາດ ແລະ ເຕັກໂນໂລຊີ (ກວຕ) ຮ່ວມກັບ ກົມແຜນທີ່ແຫ່ງຊາດ, ກະຊວງພາຍໃນ ແລະ ບໍລິສັດ

ສະເປສ ໄອ ລາວ ຈຳກັດຜູ້ດຽວ (SPACE EYE LAO) ຈັດກອງປະຊຸມ ການຮ່າວມມືທາງດ້ານວິທະຍາສາດ ແລະ ເຕັກໂນໂລຊີ ພາຍໃຕ້ແນວຄວາມຄິດໜຶ່ງແລວ ໜຶ່ງເສັ້ນທາງຂຶ້ນໃນຕອນເຊົ້າຂອງວັນທີ 03 ກຸມພາ 2018 ທີ່ໂຮງແຮມແລນມາກ, ນະຄອນຫຼວງວຽງຈັນ.

ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອເສີມຂະຫຍາຍສາຍພົວພັນ ແລະ ການຮ່ວມມືໃນຂະແໜງ ວິທະຍາສາດ ແລະ ເຕັກໂນໂລຊີ ຕາມຍຸດທະສາດໜຶ່ງແລວທາງ ໜຶ່ງເສັ້ນທາງຊຶ່ງສະເໜີໂດຍທ່ານ ສີຈິ້ນຜີງ, ປະທານປະເທດແຫ່ງ ສປ ຈີນ, ເປັນຍຸດທະສາດສາດ ການສ້າງເຂດເສດຖະກິດເສັ້ນທາງສາຍໄໝ ແລະ ເສັ້ນທາງ ສາຍໄໝທະເລສັດຕະວັດທີ 21 ແລະ ໄດ້ຮັບການສະໜັບສະໜູນ ແລະ ໃຫ້ຄວາມສໍາຄັນຫຼາຍຈາກສາກົນ, ພ້ອມ ທັງເປັນການສົ່ງເສີມສາຍພົວພັນການຮ່ວມມື ລະຫວ່າງ ສອງປະເທດ ລາວ-ຈີນ.

ໃນໂອກາດນີ້, ທ່ານ ແກ້ວນະຄອນ ໄຊສຸລຽນ, ຫົວໜ້າກົມເຕັກໂນໂລຊີດິຈິຕ໋ອນ, ກວຕໄດ້ຮັບກຽດຂຶ້ນ ກ່າວເປີດກອງປະຊຸມໃນຄັ້ງນີ້ ຊຶ່ງມີເນື້ອໃນບາງຕອນວ່າ: ອີງຕາມຄວາມຮຽກຮ້ອງຕ້ອງການທາງດ້ານການພັດທະນາເສດຖະກິດ-ສັງຄົມ, ການຂະຫຍາຍຕົວຂອງໂຄງຮ່າງ ພີ້ນຖານ ແລະ ການນຳໃຊ້ເຕັກໂນໂລຊີສືບຢັ່ງທາງໄກ ນັບມື້ນັບຫຼາຍຂຶ້ນ. ໃນວັນທີ 21 ພະຈິກ 2017, ກວຕ ແລະ ບໍລິສັດ ສະເປສ ໄອລາວ ໄດ້ມີການເຊັນບົດບັນທຶກ ຄວາມເຂົ້າໃຈວ່າດ້ວຍ ການຮ່ວມມືທາງດ້ານວິທະຍາສາດ ແລະ ເຕັກໂນໂລຊີ ຊຶ່ງທັງສອງໄດ້ຮ່ວມມືກັນ ດ້ານການນຳໃຊ້ເຕັກໂນໂລຊີນຳພາທາງ, ການສືບຢັ່ງທາງໄກ, ພາບຖ່າຍດາວທຽມ ແລະ ຍົນບໍ່ມີຄົນຂັບຊຶ່ງເປັນເຕັກນິກ ທັນສະໄໝທຽບເທົ່າລະດັບສາກົນ. ບໍລິສັດ ສະເປສ ໄອລາວ ເປັນບໍລິສັດທີ່ມີຄວາມຊ່ຽວຊານທາງດ້ານການ ສຳຫຼວດວັດແທກຂໍ້ມູນພູມມີສາດ, ສ້າງສູນກວດສອບເຕັກ ນິກການສືບຢັ່ງທາງໄກ ແລະ ຍົນບໍ່ມີຄົນຂັບ, ໂຮງງານປະກອບຍົນບໍ່ມີຄົນຂັບ, ສ້າງວິຊາການເຕັກນິກທີ່ມີ ຄວາມຮູ້ສູງ, ສ້າງສູນພົວພັນສາກົນທາງດ້ານວຽກງານເຕັກນິກ ສືບຢັ່ງທາງໄກ ເພື່ອພັດທະນາເຕັກໂນໂລຊີລະດັບສູງ ແລະ ບໍລິການຮັບໃຊ້ທຸກຂະແໜງການວຽກງານຂອງ ສປປ ລາວ.

ປີ 2018 ແມ່ນເປັນປີທ່ອງທ່ຽວລາວ, ຄາດຄະເນວ່າຈະມີນັກທ່ອງທ່ຽວປະມານ 5 ລ້ານຄົນຫຼັ່ງໄຫຼເຂົ້າມາທ່ອງທ່ຽວຢູ່ ສປປ ລາວ. ກວຕ ມີພາລະບົດບາດ ໃນການນຳເອົາວິທະຍາສາດ ແລະ ເຕັກໂນໂລຊີ ທີ່ທັນສະໄໝລະດັບສາກົນ ເຂົ້າມາພັດທະນາວຽກງານວິທະຍາສາດ ແລະ ເຕັກໂນໂລຊີ ໃຫ້ແກ່ ສປປ ລາວ, ໃນນັ້ນ ເຕັກໂນໂລຊີແຜນທີ່ນຳພາທາງ ກໍເປັນວຽກງານໜຶ່ງທີ່ສຳຄັນ ໃນການພັດທະນາຂະແໜງການທ່ອງທ່ຽວຂອງ ສປປ ລາວ.

ກວຕ ໄດ້ຮ່ວມກັບ ບໍລິສັດສະເປສ ໄອ ລາວ ໃນການສ້າງແອັບພລີເຄຊັນ Nav-Laos (ແຜນທີ່ດິຈິຕ໋ອນນຳພາທາງ) ແລະ ແອັບພລີເຄຊັນ Amazing Laos (ແຜນທີ່ດິຈິຕ໋ອນທ່ອງທ່ຽວ)ເພື່ອບໍລິການຮັບໃຊ້ປີທ່ອງທ່ຽວຂອງ ສປປ ລາວ, ພ້ອມທັງເປັນການສະໜອງການບໍລິການຮັບໃຊ້ປະຊາຊົນລາວ ແລະ ແຂກຕ່າງ ປະເທດ. ທັງສອງແອັບພລີເຄຊັນດັ່ງກ່າວ ໄດ້ມີການເປີດຕົວ ແລະ ສາທິດການນຳໃຊ້ພາຍໃນງານກອງປະຊຸມຄັ້ງນີ້ອີກດ້ວຍ.

ກອງປະຊຸມຄັ້ງນີ້, ຜູ້ເຂົ້າຮ່ວມ ໄດ້ຮັບຝັງ ກ່ຽວກັບຜົນສໍາເລັດຂອງບາງວຽກງານ, ວຽກງານທີ່ພວມດຳເນີນ ແລະ ແຜນການຮ່ວມມືໃນຕໍ່ໜ້າ ລະຫວ່າງ ກວຕ ກັບ ບໍລິສັດ ສະເປສ ໄອ ລາວ, ພ້ອມທັງການຮ່ວມມື ລະຫວ່າງ ກົມແຜນທືີ່ແຫ່ງຊາດ, ກະຊວງພາຍໃນ ກັບ ບໍລິສັດ ສະເປສ ໄອລາວ.

ການເຂົ້າຮ່ວມກອງປະຊຸມຂອງບັນດາທ່ານໃນຄັ້ງນີ້ ຈື່ງຖືເປັນກຽດອັນສູງສົ່ງໃຫ້ແກ່ກອງປະຊຸມ, ສະແດງເຖິງການໃຫ້ຄວາມສຳຄັນ, ເອົາໃຈໃສ່ຕໍ່ວຽກງານການ ຮ່ວມມື ແລະ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຢູ່ປະເທດເຮົາໃຫ້ມີບາດກ້າວຂະຫຍາຍຕົວ, ການຮ່ວມມືດ້ານການລົງທຶນກັບຕ່າງປະເທດໄດ້ຮັບ ການເປິດກວ້າງ, ດຶງດູດໄດ້ການທ່ອງທ່ຽວເຂົ້າມາປະເທດເຮົາໃຫ້ຫຼາຍຂຶ້ນ, ແນໃສ່ລົບລ້າງຄວາມທຸກຫຍາກຂອງປະຊາຊົນໃນປີ 2020 ໃຫ້ປະກົດຜົນເປັນຈິງ. ພັກລັດຖະ ບານຍາມໃດ ກໍເອົາໃຈໃສ່ຕໍ່ພາລະກິດປົກປັກຮັກສາ ແລະ ສ້າງສາພັດຖະນາປະເທດຊາດ.

ໂອກາດດຽວກັນນີ້ ໄດ້ມີພິທີເປີດປ້າຍສະຖານີອ້າງອີງຂໍ້ມູນການສຳຫຼວດວັດແທກແບບຕໍ່ເນື່ອງ, ເປີດປ້າຍສູນເຕັກໂນໂລຊີດາວທຽມສືບຍັ່ງທາງໄກ, ເປີດປ້າຍ ສູນຄົ້ນຄວ້າ, ພັດທະນາປະກອບສ້າງ ແລະ ຄຸ້ມຄອງເຮືອບິນບໍ່ມີຄົນຂັບແຫ່ງຊາດ, ເປີດໂຕແອບແຜນທີ່ນຳພາທາງ “Nav-Laos” ແລະ ແອບແຜນທີ່ທ່ອງທ່ຽວແຫ່ງຊາດ “Amazing-Laos”, ສາທິດການນຳໃຊ້ແອບ “Nav-Laos” ແລະ “Amazing-Loas” ແລະ ແນະນຳ 5 ທຸລະກິດຫຼັກຂອງບໍລິສັດ ສະເປສ ໄອ ລາວຈຳກັດຜູ້ດຽວ.

ເຂົ້າຮ່ວມກອງປະຊຸມຄັ້ງນີ້ມີທ່ານຮອງປະທານສຳນັກຂ່າວຊີນຫົວ, ສປ ຈີນ;ທ່ານຫົວໜ້າກົມແຜນທີ່ແຫ່ງຊາດ, ບັນດາຫົວໜ້າ, ຮອງຫົວໜ້າ, ຫ້ອງການ, ກົມ, ສະຖາບັນ, ກວຕ;ປະທານ ບໍລິສັດ ສະເປສ ໄອ ລາວ ຈຳກັດຜູ້ດຽວ (SPACE EYE LAO) ແລະ ບັນດາຫົວໜ້າພະແນກ, ຮອງພະແນກ, ພະນັກງານວິຊາການ ທັງພາກລັດ ແລະ ເອກະຊົນ.

ໃນຕອນເຊົ້າຂອງວັນດຽວກັນ ກໍໄດ້ມີພິທີເຊັນສັນຍາຮ່ວມມື ຈຳນວນ 3 ສະບັບ ຄື ສັນຍາຮ່ວມມືດ້ານເຕັກໂນໂລຊີດາວທຽມສືບຍັ່ງທາງໄກ, ສັນຍາຮ່ວມມື ດ້ານແຜນທີ່ນຳທາງ ແລະ ສັນຍາຮ່ວມມືດ້ານການຄົ້ນຄວ້າ, ພັດທະນາ ແລະ ປະກອບສ້າງຍົນບໍ່ມີຄົນຂັບ ລະຫວ່າງ ກະຊວງວິທະຍາສາດ ແລະ ເຕັກໂນໂລຊີ (ກວຕ) ແລະ ບໍລິສັດ ສະເປສໄອ ລາວ ຈຳກັດຜູ້ດຽວ.

ຜູ້ລົງນາມໃນບົດບັນທຶກຄວາມເຂົ້າໃຈວ່າດ້ວຍ ການຮ່ວມມືດ້ານເຕັກໂນໂລຊີດາວທຽມສືບຍັ່ງທາງໄກ, ແມ່ນ ທ່ານ ສຸມານະ ຈຸລະມະນີ, ຫົວໜ້າກົມເຕັກ ໂນໂລຊີ ແລະ ນະວັດຕະກຳ, ກວຕ ແລະ ທ່ານ ນ. ພູຄຳ ວົງວິຈິດ, ປະທານບໍລິສັດ ສະເປສໄອ ລາວ ຈຳກັດຜູ້ດຽວ; ຜູ້ລົງນາມໃນບົດບັນທຶກຄວາມເຂົ້າໃຈວ່າດ້ວຍ ການຮ່ວມມືດ້ານແຜນທີ່ນຳພາທາງ, ແມ່ນ ທ່ານ ແກ້ວນະຄອນ ໄຊສຸລຽນ, ຫົວໜ້າກົມເຕັກໂນໂລຊດິຈິຕ໋ອນ ແລະ ທ່ານ ນ. ພູຄຳ ວົງວິຈິດ, ປະທານບໍລິສັດ ສະເປສໄອ ລາວ ຈຳກັດຜູ້ດຽວ ແລະ ຜູ້ລົງນາມໃນບົດບັນທຶກຄວາມເຂົ້າໃຈວ່າດ້ວຍ ການຮ່ວມມືດ້ານການຄົ້ນຄວ້າ, ພັດທະນາ ແລະ ປະກອບສ້າງຍົນບໍ່ມີຄົນຂັບ, ແມ່ນ ທ່ານ ວິລະສັກ ອິນທະປະຖາ, ຫົວໜ້າ ສະຖາບັນເຕັກໂນໂລຊີຄອມພິວເຕີ ແລະ ເອເລັກໂຕຣນິກ ແລະ ທ່ານ ນ. ພູຄຳ ວົງວິຈິດ, ປະທານບໍລິສັດ ສະເປສໄອ ລາວ ຈຳກັດຜູ້ດຽວ.

ໃນພິທີລົງນາມຄັ້ງນີ້ ໄດ້ຮັບກຽດເຂົ້າຮ່ວມເປັນສັກຂີພິຍານຂອງທ່ານ ບັນດິດ ສຈ. ບໍ່ວຽງຄໍາ ວົງດາລາ, ລັດຖະມົນຕີ ກວຕ, ພ້ອມດ້ວຍທ່ານຮອງ ລັດຖະມົນຕີ, ຫົວໜ້າຫ້ອງການ, ກົມ, ສະຖາບັນ, ກວຕ ແລະ ພະນັກງານທີ່ກ່ຽວຂ້ອງທັງສອງຝ່າຍ.

ຂ່າວ: ບາລະຄອນ ສຸວັນນະພາສີ

ຮູບພາບ: ທັດສະນີ ພົງບັນດິດ

altaltaltaltaltaltaltaltalt