ຂະແໜງ ວິທະຍາສາດ ແລະ ເຕັກໂນໂລຊີ ນຳສະເໜີຢູ່ເວທີປຶກສາຫາລືການຮ່ວມມື ລາວ-ຈີນ ໃນຂອບ “ໜຶ່ງແລວ ໜຶ່ງເສັ້ນທາງ”

Alternative flash content

To view this Flash you need Javascript on your browser and updated version of flash player.

Get Adobe Flash player

ແນະນຳ ກ.ວ.ຕ (MOST)

ລົງທະບຽນຜູ້ໃຊ້



Home ຂ່າວສານ ຂ່າວສານ ການພົວພັນ ແລະ ຮ່ວມມື ເຕັກໂນໂລຊີ ຂະແໜງ ວິທະຍາສາດ ແລະ ເຕັກໂນໂລຊີ ນຳສະເໜີຢູ່ເວທີປຶກສາຫາລືການຮ່ວມມື ລາວ-ຈີນ ໃນຂອບ “ໜຶ່ງແລວ ໜຶ່ງເສັ້ນທາງ”

ຂະແໜງ ວິທະຍາສາດ ແລະ ເຕັກໂນໂລຊີ ນຳສະເໜີຢູ່ເວທີປຶກສາຫາລືການຮ່ວມມື ລາວ-ຈີນ ໃນຂອບ “ໜຶ່ງແລວ ໜຶ່ງເສັ້ນທາງ”

altເຫດການອັນພົ້ນເດັ່ນ ແລະ ມີຄວາມໝາຍສໍາຄັນທີ່ສຸດ ແມ່ນໃນວັນທີ 13 ພະຈິກ 2017, ພະນະທ່ານ ບຸນຍັງ

ວໍລະຈິດ, ປະທານປະເທດແຫ່ງ ສປປ ລາວ ແລະ ພະນະທ່ານ ສີຈິ້ນຜີງ, ປະທານປະເທດແຫ່ງ ສປ ຈີນ ໄດ້ເປັນສັກຂີພິຍານໃນການລົງນາມ ຂໍ້ຕົກລົງການຮ່ວມມືທາງດ້ານວິທະຍາສາດ ແລະ ເຕັກໂນໂລຊີ ລະຫ່ວາງ ລັດຖະບານ ສປປ ລາວ ແລະ ລັດຖະບານ ສປ ຈີນ.

ຂໍ້ຄວາມຂ້າງເທິງນັ້ນ ຄື ຄຳເຫັນບາງຕອນຂອງ ທ່ານ ບັນດິດ ສຈ. ບໍ່ວຽງຄຳ ວົງດາລາ, ກຳມະການສູນ ກາງພັກ, ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ (ກວຕ) ໄດ້ປະກອບຄຳເຫັນຢູ່ເວທິປຶກສາຫາລື ການຮ່ວມມືລາວ-ຈີນ ເວທີດັ່ງກ່າວ ໄດ້ຈັດຂຶ້ນໃນ ລະຫວ່າງ ວັນທີ 2-3 ກຸມພາ 2018 ທີ່ໂຮງແຮມແລນມາກ ນະຄອນຫຼວງວຽງຈັນ ໂດຍການເປັນປະທານຮ່ວມຂອງ ທ່ານ ກິແກ້ວ ໄຂຄຳພິທູນ, ຄະນະເລຂາທິການສູນ ກາງພັກ, ຫົວໜ້າຄະນະໂຄສະນາອົບຮົມສູນກາງພັກ ປະຊາຊົນ ປະຕິວັດລາວ; ທ່ານ ໄຈ ມີງເຈົ້າ, ກໍາມະການ ສູນກາງພັກ, ຮອງຫົວໜ້າຄະນະໂຄສະນາອົບຮົມສູງກາງ ພັກກອມມູນີດ ຈີນ, ປະທານສຳນັກຂ່າວສານຊິນຮວາ ສປ ຈີນ.

ລາວ-ຈີນ ຮ່ວມກັນຈັດເວທີປຶກສາຫາລື ການຮ່ວມມື ລາວ-ຈີນ ໃນຂອບ “ໜຶ່ງແລວ ໜຶ່ງເສັ້ນທາງ” ເພື່ອພ້ອມກັນຜັນຂະຫຍາຍ ຍຸດທະສາດຫັນປະເທດ ທີ່ບໍ່ມີຊາຍແດນຕິດກັບທະເລໃຫ້ກາຍເປັນປະເທດເຊື່ອມຈອດ ແລະ ເຊື່ອມໂຍງກັບພາກພື້ນ ແລະ ສາກົນ ຂອງ ສປປ ລາວ ແລະ ຂໍ້ລິເລີ່ມ “ໜຶ່ງແລວ ໜຶ່ງເສັ້້ນທາງ” ຂອງ ສປ ຈີນ ກໍຄືເປັນການຊຸກຍູ້ ແລະ ຜັນຂະຫຍາຍຜົນສໍາເລັດຂອງການຢ້ຽມຢາມ ສປປ ລາວ ເປັນທາງການຂອງເລຂາທິການໃຫຍ່ ສີ ຈິ້ນຜິງ ໃນທ້າຍປີ 2017 ຜ່ານມາ ຊຶ່ງເປັນການຮັດແໜ້ນສາຍພົວພັນມິດຕະພາບອັນເປັນມູນເຊື້ອ, ຄູ່ຮ່ວມມືຍຸດທະສາດ, ໝັ້ນຄົງຍາວນານ ໃຫ້ກ້າວສູ່ໄລຍະໃໝ່ ແລະ ເປັນຂີດໝາຍສຳຄັນຂອງການຮ່ວມມື ລາວ-ຈີນ ໃນໄລຍະໃໝ່.

ຈຸດປະສົງໃນການຈັດເວທິປຶກສາຫາລືການຮ່ວມມື ລາວ-ຈີນ ຄັ້ງນີ້ ກໍເພື່ອເປັນການເຊື່ອມຈອດຍຸດທະສາດຫັນປະເທດທີ່ບໍ່ມີຊາຍແດນຕິດກັບທະເລໃຫ້ກາຍ ເປັນປະເທດເຊື່ອມຈອດ ເຊື່ອມໂຍງກັບພາກພື້ນ ແລະ ສາກົນ ຂອງ ສປປ ລາວ ກັບຂໍ້ລິເລີ່ມ “ໜຶ່ງແລວ ໜຶ່ງເສັ້ນທາງ” ຂອງ ສປ ຈີນ ເປັນເນື້ອໃນຫລັກຢູ່ເວທີປຶກສາຫາ ລືນີ້ ໂດຍປິ່ນອ້ອມຫລາຍຂົງເຂດການຮ່ວມມື ລາວ-ຈີນ ຊຶ່ງໄດ້ປຶກສາຫາລືກ່ຽວກັບກາລະໂອກາດຕ່າງໆໃນການຮ່ວມມືໃນຫຼາຍດ້ານ ລະຫວ່າງ ສອງປະເທດໃນປັດຈຸບັນ.

ໂອກາດດັ່ງກ່າວ, ທ່ານ ບັນດິດ ສຈ. ບໍ່ວຽງຄຳ ວົງດາລາ, ກຳມະການສູນກາງພັກ, ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ (ກວຕ) ໄດ້ປະກອບ ຄຳເຫັນຢູ່ເວທິປຶກສາຫາລືການຮ່ວມມືລາວ-ຈີນຄັ້ງນີ້ວ່າ: ສປປ ລາວ ແລະ ສປ ຈີນ ເປັນສອງປະເທດມີສາຍພົວພັນອັນດີງາມມາແຕ່ຍາວນານ ພາຍໃຕ້ການຊີ້ນຳ-ນໍາ ພາຂອງພັກ-ລັດ ຂອງສອງປະເທດ ລາວ ແລະ ຈີນ ໄດ້ເຮັດໃຫ້ການຮ່ວມມືຂອງພວກເຮົາໄດ້ຮັບໝາກຜົນຢ່າງໃຫຍ່ຫຼວງໃນຫຼາຍດ້ານ. ພວກເຮົາ ໄດ້ສະໜັບສະໜູນ ແລະ ຊຸກຍູ້ເຊິ່ງກັນ ແລະ ກັນຢ່າງຕໍ່ເນື່ອງໃນຂົງເຂດວຽກງານຕ່າງໆ ທັງພາຍໃນ ແລະ ສາກົນ ຊຶ່ງໄດ້ສ້າງຜົນປະໂຫຍດໃຫ້ແກ່ປະຊາຊົນທັງສອງປະເທດ. ເຖິງວ່າປັດຈຸບັນນີ້, ສະພາບການຂອງໂລກ ມີຫຼາຍບັນຫາສັບສົນ ແລະ ຄາດເດົາໄດ້ຍາກ, ແຕ່ທັງສອງປະເທດ ລາວ ແລະ ຈີນ ຍັງໄດ້ສືບຕໍ່ຢຶດໝັ້ນແນວທາງ ໝັ້ນຄົງ, ເປັນປະເທດບ້ານ ໃກ້ເຮືອນຄຽງທີ່ດີຕໍ່ກັນ, ມີຄວາມຊື່ສັດຕໍ່ກັນ ແລະ ຮ່ວມມືຫຼາຍດ້ານແລະ ປະຕິບັດແນວທາງ 4 ດີ ຄື ບ້ານໃກ້ເຮືອນຄຽງທີ່ດີ, ໝູ່ເພື່ອນທີ່ດີ, ສະຫາຍທີ່ດີ ແລະ ເພື່ອນຮ່ວມງານທີ່ດີ”, ເພີ່ມທະວີປະສິດທິຜົນທາງດ້ານການຮ່ວມມື, ຍົກສູງລະດັບການພົວພັນທາງດ້ານວິທະຍາສາດ ແລະ ເຕັກໂນໂລຊີ ເພື່ອເຮັດໃຫ້ການຮ່ວມມືສອງ ປະເທດກ້າວຂຶ້ນສູ່ລະດັບໃໝ່.

ໃນລະດູບານໃໝ່ ປີ 2013, ທ່ານ ສີຈິ້ນຜີງ, ປະທານປະເທດແຫ່ງ ສປ ຈີນ ໄດ້ສະເໜີຍຸດທະສາດ ການສ້າງເຂດເສດຖະກິດເສັ້ນທາງສາຍໄໝ ແລະ ເສັ້ນທາງ ສາຍໄໝທະເລສັດຕະວັດທີ 21, ຊຶ່ງຍຸດທະສາດດັ່ງກ່າວ ໄດ້ຮັບການສະໜັບສະໜູນ ແລະ ໃຫ້ຄວາມສໍາຄັນຫຼາຍຈາກສາກົນ. ໃນນັ້ນ, ນະໂຍບາຍ “ໜຶ່ງແລວທາງ, ໜຶ່ງເສັ້ນທາງ” ເປັນນະໂຍບາຍການພັດທະນາແບບສັນຕິ ທີ່ສອດຄ່ອງກັບຄວາມປາຖະໜາໃນການພັດທະນາເສດຖະກິດ-ສັງຄົມ ຂອງບັນດາປະເທດຕ່າງໆໃນພາກພື້ນ ແລະ ໃນໂລກ. ຍຸດທະສາດ “ໜຶ່ງແລວທາງ, ໜຶ່ງເສັ້ນທາງ” ຍັງສາມາດສົ່ງເສີມ ແລະ ສ້າງໂອກາດຫຼາຍຢ່າງທາງດ້ານການພັດທະນາວິທະຍາສາດ ແລເ ເຕັກໂນໂລຊີ, ເສດຖະກິດ, ການກໍ່ສ້າງໂຄງລ່າງພື້ນຖານ ແລະ ການພັດທະນາຊັບພະຍາກອນມະນຸດອີກດ້ວຍ.

ປະຈຸບັນນີ້, ສປປ ລາວ ໄດ້ໃຫ້ຄວາມສໍາຄັນ ແລະ ກໍາລັງມີສ່ວນຮ່ວມໃນການກໍ່ສ້າງ “ໜຶ່ງແລວທາງ, ໜຶ່ງເສັ້ນທາງ”, ເປັນຕົ້ນແມ່ນສະແດງອອກໃນການຮ່ວມ ມືທາງດ້ານວິທະຍາດສາດ ແລະ ເຕັກໂນໂລຊີ ຂອງສອງປະເທດລາວ-ຈີນ. ໃນວັນທີ 21 ພະຈິກ ປີ 2015, ຢູ່ສະຖານີສົ່ງດາວທຽມພາກພື້ຶ້ນດິນສີຊາງ ສປ ຈີນ ໄດ້ສຳເລັດ ການສົ່ງດາວທຽມລາວ “LAOSAT-1” ຂຶ້ນສູ່ວົງໂຄຈອນອະວະກາດຊຶ່ງເປັນດາວທຽມໂທລະຄົມມະນາຄົມ ແລະ ການສື່ສານດວງທໍາອິດຂອງ ສປປ ລາວ ແລະ ທັງເປັນ ໂຄງການສັນຍາລັກການຮ່ວມມືຂົງເຂດວຽກງານວິທະຍາສາດເຕັກໂນໂລຊີ ລະດັບສູງຂອງສອງປະເທດ ລາວ-ຈີນ. ໂຄງການດັ່ງກ່າວບໍ່ພຽງແຕ່ສາມາດຍົກສູງລະດັບການ ພັດທະນາເຕັກໂນໂລຊີ ແລະ ບຸກຄະລາກອນຂອງ ສປປ ລາວ ເທົ່ານັ້ນ, ແຕ່ຍັງສົ່ງເສີມການພັດທະນາເສດຖະກິດ-ສັງຄົມ ແລະ ປັບປຸງຊີວິດການເປັນຢູ່ຂອງປະຊາຊົນ ລາວໃຫ້ດີຂື້ນອີກດ້ວຍ.

ໃນຊຸມປີຜ່ານມານີ້, ກວຕ, ສປປ ລາວ ແລະ ກະຊວງວິທະຍາສາດ ແລະ ເຕັກໂນໂລຊີ ສປ ຈີນ ໄດ້ຮ່ວມມືກັນຫຼາຍດ້ານຊຶ່ງອັນທີ່ພົ້ນເດັ່ນ ແມ່ນກໍ່ສ້າງຫ້ອງ ທົດລອງພະລັງງານທົດແທນ, ສວນສາທິດວິທະຍາສາດ ແລະ ເຕັກໂນໂລຊີກະສິກໍາທັນສະໄໝ, ສູນຖ່າຍທອດເຕັກໂນໂລຊີລາວ-ຈີນ ແລະ ອື່ນໆ.

ບົນພື້ນຖານສັນຍາດັ່ງກ່າວນັ້ນ, ສອງກະຊວງວິທະຍາສາດ ລະ ເຕັກໂນໂລຊີ ຂອງທັງສອງປະເທດ ໄດ້ຕົກລົງສ້າງຕັ້ງຄະນະກໍາມະການຮ່ວມມືທາງດ້ານວິທະຍາ ສາດ ແລະ ເຕັກໂນໂລຊີ, ເພື່ອກໍານົດຂົງເຂດວຽກງານການຮ່ວມມືທີ່ເປັນບູລິມະສິດ, ສົ່ງເສີມການຮ່ວມມືດ້ານວິທະຍາສາດ, ເຕັກໂນໂລຊີ ແລະ ນະວັດຕະກໍາ ໃຫ້ຂະ ຫຍາຍຕົວສູງຂຶ້ນກວ່າເກົ່າ.

ອີງຕາມຄວາມຮຽກຮ້ອງຕ້ອງການຂອງການພັດທະນາເສດຖະກິດ-ສັງຄົມ ເຫັນວ່າ ການສ້າງພື້ນຖານໂຄງລ່າງ ແລະ ການນໍາໃຊ້ເຕັກໂນໂລຊີສືບຍັ່ງທາງໄກມີ ຄວາມຈໍາເປັນທີ່ນັບມື້ນັບຫຼາຍຂຶ້ນ. ສະນັ້ນ, ກວຕ ຈຶ່ງໄດ້ຮ່ວມມືກັບບໍລິສັດສະເປັກໄອລາວໃນການນໍາໃຊ້ເຕັກໂນໂລຊີການສືບຍັ່ງທາງໄກ, ພາບຖ່າຍດາວທຽມ ແລະ ຍົນບໍ່ມີຄົນຂັບທີ່ທັນສະໄໝເພື່ອປະກອບສ່ວນເຂົ້າໃນການພັດທະນາ. ຜ່ານການຮ່ວມມືດັ່ງກ່າວເຫັນວ່າ ບໍລິສັດສະເປັນໄອລາວ ເປັນບໍລິສັດທີ່ມີຄວາມຊ່ຽວຊານທາງ ດ້ານການສໍາຫຼວດວັດແທກຂໍ້ມູນພູມສາດ, ພັດທະນາ ແລະ ນໍາໃຊ້ເຕັກນິກການສືບຍັ່ງທາງໄກ ແລະ ສາມາດປະກອບຍົນບໍ່ມີຄົນຂັບ, ສ້າງນັກວິຊາການທີ່ມີຄວາມຮູ້ສູງ ເພື່ອພັດທະນາເຕັກໂນໂລຊີລະດັບສູງ ແລະ ບໍລິການຮັບໃຊ້ບັນດາຂະແໜງການຕ່າງໆຢູ່ ສປປ ລາວ.

ປີ 2018 ນີ້ ແມ່ນປີທອ່ງທ່ຽວລາວ, ສະນັ້ນ ເພື່ອຮອງຮັບ ແລະ ສົ່ງເສີມໃຫ້ບັນດານັກທ່ອງທ່ຽວຈາກຫຼາຍປະເທດ ເຂົ້າມາທ່ອງທ່ຽວຢູ່ ສປປ ລາວ ນັ້ນ, ກວຕ ຈະນໍາເອົາວິທະຍາສາດ ແລະ ເຕັກໂນໂລຊີທີ່ທັນສະໄໝເຂົ້າມາຊ່ວຍຊຸກຍູ້ວຽກງານການທ່ອງທ່ຽວຢູ່ ສປປ ລາວ, ໃນນັ້ນ ເຕັກໂນໂລຊີແຜນທີ່ນໍາພາທາງກໍເປັນວຽກງານ ໜຶ່ງທີ່ສໍາຄັນໃນການພັດທະນາຂະແໜງການທ່ອງທ່ຽວ. ກວຕ ລາວ ໄດ້ຮ່ວມມືກັບ ບໍລິສັດສະເປັກໄອລາວ ໃນການສ້າງ ແອັບພລິເຄຊັນ Nav-Laosແຜນທີ່ນໍາ ພາທາງແລະ ແອັບພລິເຄຊັນ Amazing Laos (ແຜນທີ່ທ່ອງທ່ຽວ) ເພື່ອບໍລິການຮັບໃຊ້ປີທ່ອງທ່ຽວຂອງ ສປປ ລາວ ພ້ອມທັງເປັນການສະໜອງການບໍລິການຮັບ ໃຊ້ປະຊາຊົນລາວ ແລະ ແຂກຕ່າງປະເທດ. ທັງສອງ App ນີ້ຈະໄດ້ມີການເປີດພິທີນໍາໃຊ້ໃນກອງປະຊຸມຄັ້ງນີ້. ພ້ອມດຽວກັນນັ້ນ, ປີ 2018 ແມ່ນປີ “ນະວັດຕະກໍາ ອາຊຽນ-ຈີນ”, ສະນັ້ນ ກວຕ ລາວ ຈະສືບຕໍ່ຮ່ວມມືກັບ ສປ ຈີນ ໃນວຽກງານວິທະຍາສາດ ແລະ ເຕັກໂນໂລຊີ, ເສີມຂະຫຍາຍການພົວພັນ ແລະ ພັດທະນາບຸກຄະລາ ກອນ, ສົ່ງເສີມການຮ່ວມມືພັດທະນາ ແລະ ນໍາໃຊ້ເຕັກໂນໂລຊີໃໝ່, ເພື່ອປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ແລະ ຍົກລະດັບຊີວິດການເປັນຢູ່ຂອງ ປະຊາຊົນລາວ. ກວຕ ຂອງ ສປປ ລາວ ພ້ອມທີ່ຈະປະກອບສ່ວນໃນການປະຕິບັດໂຄງການ “ໜຶ່ງແລວທາງ, ໜຶ່ງເສັ້ນທາງ” ຕາມການຕົກລົງຂອງສອງພັກ ແລະ ລັດຖະບານລາວ ແລະ ຈີນ ທີ່ໄດ້ວາງອອກແລ້ວນັ້ນໃຫ້ປະກົດຜົນເປັນຈິງ.

ເວທີດັ່ງກ່າວ ມີບັນດາຂໍ້ສະເໜີທີ່ສ້າງສັນ ແລະ ສາມາດປະຕິບັດໄດ້ໂດຍແມ່ນບັນດາເຈົ້າໜ້າທີ່ໃນຂົງເຂດຕ່າງໆທີ່ກ່ຽວຂ້ອງ, ບັນດາຊ່ຽວຊານ, ຜູ້ຮັບຜິດຊອບສະ ພາການຄ້າ, ສະຖາບັນການທະນາຄານ, ວິສາຫະກິດຂອງຈີນທີ່ມາລົງທືນຢູ່ລາວ ກໍຄື ນັກລົງທຶນຂອງຈີນທີ່ມີຄວາມສົນໃຈຢາກມາລົງທຶນຢູ່ລາວ ໄດ້ ປືກສາຫາລື ແລະ ແລກປ່ຽນຄຳຄິດຄຳເຫັນຮ່ວມກັນ.

ບົດຂ່າວ ແລະ ຮູບພາບ: ທັດສະນີ ພົງບັນດິດ

altaltalt