Alternative flash content

To view this Flash you need Javascript on your browser and updated version of flash player.

Get Adobe Flash player

ແນະນຳ ກ.ວ.ຕ (MOST)

ລົງທະບຽນຜູ້ໃຊ້



Home ຂ່າວສານ ຂ່າວສານ ການພົວພັນ ແລະ ຮ່ວມມື ເຕັກໂນໂລຊີ ໂຄງການຮ່ວມມື ລາວ-ຈີນ ເປີດການນຳໃຊ້ຫ້ອງທົດລອງ

ໂຄງການຮ່ວມມື ລາວ-ຈີນ ເປີດການນຳໃຊ້ຫ້ອງທົດລອງ

15ໃນຕອນແລງວັນທີ 09 ມັງກອນ 2018, ສະຖາບັນພະລັງງານທົດແທນ ແລະ ວັດສະດຸໃໝ່, ກະຊວງວິທະຍາສາດ ແລະ ເຕັກໂນໂລຊີ (ກວຕ)

ໄດ້ຈັດພິທີເປິດການນຳໃຊ້ຫ້ອງທົດລອງຂອງ “ໂຄງການຮ່ວມມື ລາວ-ຈີນ ເພື່ອການພັດທະນາ ແລະ ນຳໃຊ້ພະລັງງານທົດແທນ”.

ໃຫ້ກຽດເຂົ້າຮ່ວມໃນພິທີດັ້ງກ່າວ ມີ ທ່ານ ບັນດິດ. ສຈ ບໍ່ວຽງຄໍາ ວົງດາລາ, ລັດຖະມົນຕີ ກວຕຊີ, ທ່ານ ຫວ່າງ ເຫວິນ ທ່ຽນ, ເອກອັກຄະລັດຖະທູດ ແຫ່ງ ສປ ຈີນ ປະຈຳລາວ; ທ່ານ ສຈ. ດຣ. ຈຽງ ຢົງເຫວີນ, ອະທິການບໍດີ ມະຫາວະທະຍາໄລ ສ້າງຄູຢຸນນານ, ສປ ຈີນ, ບັນດາ ທ່ານຮອງລັດຖະມົນຕີ, ຫົວໜ້າຫ້ອງການ, ຫົວໜ້າກົມ, ສະຖາບັນພາຍໃນກະຊວງ, ບັນດາແຂກທີ່ຖືກເຊີນຈາກຄະນະວິສະວະກຳສາດ, ຄະນະວິທະຍາສາດ ມຊ ແລະ ຈາກ ກະຊວງວພະລັງງານ ແລະ ບໍ່ແຮ່ ພ້ອມດ້ວຍພະນັກງານພາຍໃນສະຖາບັນ.

ໂອກາດນີ້, ທ່ານ ນ. ໄມຕີ ວົງຄຳຊາວ, ຫົວໜ້າສະຖາບັນພະລັງານທົດແທນ ແລະ ວັດສະດຸໃໝ່, ກວຕ ໄດ້ລາຍງານຫຍໍ້ຜົນສຳເລັດຂອງໂຄງການດັ່ງກ່າວ ວ່າ: ການຮ່ວມມື ລະຫວ່າງ ສປປ ລາວ ແລະ ສປ ຈີນ ແມ່ນມີມາຍາວນານ ນັບແຕ່ປີ 1961 ມາຮອດປັດຈຸບັນນີ້ ພໍດີ 56 ປີ ແຫ່ງສາຍພົວພັນເພື່ອນມິດຍຸດທະສາດ ຊຶ່ງມີຄວາມຄືບໜ້າ ແລະ ຂະຫຍາຍຕົວຢ່າງເປັນຮູບປະທຳຂຶ້ນສູ່ລະດັບໃໝ່ຢ່າງຕໍ່ເນື່ອງ. ການຮ່ວມມືຂອງສອງຝ່າຍ ລາວ-ຈີນ ປະກົດໃຫ້ເຫັນອັນພົ້ນເດັ່ນຫຼາຍດ້ານ. ອັນພົ້ນເດັ່ນທີ່ສຸດ ເມື່ອງບໍ່ດົນມານີ້, ພະນະທ່ານປະທານ ສີຈິນຜິງ ໄດ້ມາຢ້ຽມຢາມ ສປປ ລາວ ຢ່າງເປັນທາງການ ແລະ ໄດ້ເປີດກວ້າງການຮ່ວມມືໃນຫຼາຍຂົງເຂດ ໃນນັ້ນ ວຽກງານວິທະຍາສາດ ແລະ ເຕັກໂນໂລຊີຂອງພວກເຮົາ ກໍໄດ້ມີການເຊັນສັນຍາຮ່ວມມືກັນ.

ເພື່ອຈັດຕັ້ງປະຕິບັດຕາມສົນທິສັນຍາ ໂຄງການຮ່ວມມືທາງດ້ານວິທະຍາສາດ ແລະ ເຕັກໂນໂລຊີ ລາວ-ຈີນ, ກວຕ ສປປ ລາວ ແລະ ກວຕ ສປ ຈີນ ໄດ້ມອບໃຫ້ສະຖາບັນພະລັງງານທທົດແທນ ແລະ ວັດສະດຸໃໝ່ ແລະ ມະຫາວິທະຍາໄລ ສ້າງຄູຢຸນນານ ຈັດຕັ້ງປະຕິບັດໂຄງການສ້າງຫ້ອງທົດລອງຮ່ວມມື ລາວ-ຈີນ ເພື່ອການພັດທະນາ ແລະ ການນຳໃຊ້ພະລັງງານທົດແທນ ຊຶ່ງໄດ້ເຊັນສັນຍາຮ່ວມມື ໃນວັນທີ 03 ກັນຍາ 2013 ທີ່ນານໜິງ ສປ ຈີນ ແລະ ໄດ້ເລີມຈັດຕັ້ງປະຕິບັດໂຄງການຕົວຈິງ ໃນກາງປີ 2015 ເປັນຕົ້ນມາ. ໂຄງການດັ່ງກ່າວ ແມ່ນໂຄງການຊ່ວຍເຫຼືອຫຼ້າ ຊຶ່ງແມ່ນງົບປະມານຂອງ ກະຊວງວິທະຍາສາດ ແລະ ເຕັກໂນໂລຊີ ສປ ຈີນ, ມູນຄ່າທັງໝົດ 5,820,000 ຢວນ.  ໃນຈໍານວນງົບທີ່ກ່າວມານີ້, ຝ່າຍຈີນ ໃຫ້ການຊ່ວຍເຫຼືອເປັນອຸປະກອນຫ້ອງທົດລອງ, ອຸປະກອນສາທິດ ການນຳໃຊ້ພະລັງານທົດແທນ ແລະ ທຶນການສຶກສາລະດັບປະລິນຍາໂທ-ປະລິນຍາເອກ. ສ່ວນຝ່າຍ ກວຕ ຮັບຜິດຊອບກະກຽມອາຄານຫ້ອງທົດລອງ ເພື່ອຮອງຮັບອຸປະກອນດັ່ງກ່າວ. ຂະນະນີ້, ການກໍ່ສ້າງອາຄານ ໄດ້ສຳເລັດແລ້ວ ຕົກເປັນມູນຄ່າທັງໝົດປະມານ 3 ຕື້ກວ່າກີບ. ຝ່າຍ ກວຕ ຍັງຮັບຜິດຊອບກະກຽມ ແລະ ຄັດເລືອກສະຖານທີ່ ໃນການຕິດຕັ້ງອຸປປະກອນ ເພື່ອສາທິດໃຫ້ຂະແໜງການ ແລະ ປະຊາຊົນທົດລອງນຳໃຊ້ອຸປະກອນດັ່ງກ່າວ.

ປັດຈຸບັນ, ການປະຕິບັດໂຄງການຮ່ວມມືດັ່ງກ່າວ ໄດ້ສໍາເລັດຕາມແຜນທີ່ວາງໄວ້ ເຊັ່ນ: ການກໍ່ສ້າງຊັບພະຍາກອນມະນຸດໃຫ້ແກ່ ກວຕ. ເລີ່ມແຕ່ປີ 2014-2017, ກວຕ ໄດ້ຮັບທຶນຈາກ ມະຫາວິທະຍາໄລສ້າງຄູຢຸນນານ ຈຳນວນ 14 ທຶນ (ປະລິນຍາເອກ 3 ແລະ ປະລິນຍາໂທ 11 ຄົນ). ປັດຈຸບັນ, ນັກສຶກສາ ຈົບປະລິນຍາໂທມາແລ້ວ 1 ຄົນ ແລະ ກຳລັງຈົບໂທໃນປີນີ້ອີກ 2 ຄົນ; ສຳເລັດການຕິດຕັ້ງອຸປະກອນສາທິດນຳໃຊ້ພະລັງງານທົດແທນດັ່ງນີ້: ໄຟຟ້າເຍືອງທາງດ້ວຍພະລັງງານແສງຕາເວັນ ຈຳນວນ 50 ຊຸດ, ບໍ່ແກັສຊີວະພາບ 50 ຊຸດ, ລະບົບນ້ຳຮ້ອນພະລັງງານແສງຕາເວັນ 83 ຊຸດ, ປໍ້ານໍ້າພະລັງງານແສງຕາເວັນ 2 ຊຸດ ແລະ ເຕົາຊີວະມວນ 700 ເຕົາ. ບັນດາອຸປະກອນສາທິດດັ່ງກ່າວ ໄດ້ຕິດຕັ້ງຢູ່ຈຸດຕ່າງໆດັ່ງນີ້: ສະຖາບັນພະລັງງານທົດແທນ ແລະ ວັດສະດຸໃໝ່, ແຂວງວຽງຈັນ, ໂຮງຮຽນເດັກກຳພ້າ 67, ໂຮງໝໍ, ໂຮງຮຽນເມືອງສັງທອງ, ໂຮງໝໍເມືອງນາຊາຍທອງ, ໂຮງໝໍເມືອງໄຊເສດຖາ, ໂຮງໝໍແມ່ ແລະ ເດັກ. ອຸປະກອນສາທິດ ຍັງຕິດຕັ້ງຢູ່ ແຂວງໄຊຍະບູລີ, ແຂວງບໍລິຄຳໄຊ ແລະ ມອບໃຫ້ກອງທັບຈຳນວນໜຶ່ງ.

ສຳເລັດການກໍ່ສ້າງອາຄານຫ້ອງທົດລອງ, ຕິດຕັ້ງ ແລະ ປະກອບອຸປະກອນ ເຄື່ອງມືໃສ່ຫ້ອງທົດລອງ ແລະ ກຽມພ້ອມນຳໃຊ້ເຂົ້າໃນການຄົ້ນຄວ້າ. ເພື່ອຮັບປະກັນໃນການສາທິດທົດລອງນໍາໃຊ້ອຸປະກອນດັ່ງກ່າວ ໃຫ້ມີປະສິດທິຜົນໃນອະນາຄົດ, ສະຖາບັນດັ່ງກ່າວ ໄດ້ຈັດຝຶກອົບຮົມ ຈຳນວນ 2 ຄັ້ງຄື: ການຝຶກອົບຮົມ ການຕິດຕັ້ງແກັສຊີວະພາບ, ໄຟເຍືອງທາງແສງຕາເວັນ ແລະ ເຄື່ອງຜະລິດນ້ຳຮ້ອນແສງຕາເວັນ ໃນລະຫວ່າງວັນທີ 22-24 ພຶດສະພາ 2017 ທີ່ສະຖາບັນ. ລັກສະນະຂອງການຝຶກ ເປັນການຝຶກໃຫ້ພະນັກງານວິຊາການຢູ່ຈຸດສາທິດ ທີ່ມີອຸປະກອນຂອງໂຄງການຕິດຕັ້ງຢູ່ ເພື່ອສ້າງຄວາມເຂັ້ມແຂງໃຫ້ພະນັກງານວິຊາການໄດ້ຮຽນຮູ້ວິທີປະກອບ, ຂັ້ນຕອນການຕິດຕັ້ງ, ການບຳລຸງຮັກສາເຄື່ອງອຸປະກອນຕ່າງໆ ແລະ ຖ້າມີບັນຫາຂັດຂ້ອງ ກໍສາມາດແກ້ໄຂໄດ້ດ້ວຍຕົນເອງ; ການຝຶກອົບຮົມນາໆຊາດ ຫົວຂໍ້ ເຕັກໂນໂລຊີພະລັງງານທົດແທນ ແລະ ການນຳໃຊ້ ໃນລະຫວ່າງວັນທີ 25 ກໍລະກົດ ຫາ 12 ສິງຫາ 2017 ທີ່ໂຮງແຮມນິວໂຣສ ນະຄອນຫຼວງວຽງຈັນຊຶ່ງມີນັກສຳມະນາກອນເຂົ້າຮ່ວມຈຳນວນ 20 ທ່ານ ຊຶ່ງ  ໃນຈໍານວນນີ້ ມີຕ່າງປະເທດຈຳນວນ 3 ທ່ານທີ່ມາຈາກປະເທດໄທ, ຫວຽດນາມ ແລະ ພາກສ່ວນທີ່ກ່ຽວຂ້ອງ.

ເພື່ອສືບຕໍ່ຈັດຕັ້ງປະຕິບັດ “ໂຄງການສ້າງຫ້ອງທົດລອງຮ່ວມມື ລາວ-ຈີນ ເພື່ອການພັດທະນາ ແລະ ການນຳໃຊ້ພະລັງງານທົດແທນ” ຈະມີການເຜີຍແຜ່ໝາກຜົນການຄົ້ນຄວ້າອອກສູ່ສັງຄົມໃຫ້ຫຼາຍຂຶ້ນກວ່າເກົ່າ. ທາງສະຖາບັນ ຈຶ່ງຂໍສະເໜີສືບຕໍ່ການຮ່ວມມື ກັບມະຫາວິທະຍາໄລສ້າງຄູຢຸນນານ ສປ ຈີນ ໃນການຄົ້ນຄວ້າ ນຳໃຊ້ພະລັງງານທົດແທນ ແລະ ການກໍ່ສ້າງຊັບພະຍາກອນມະນຸດ ທັງໄລຍະສັ້ນ ແລະ ໄລຍະຍາວ.

ພາຍຫຼັງສຳເລັດການລາຍງານຫຍໍ້ກ່ຽວກັບການຮ່ວມມືຂອງ ໂຄງການດັ່ງກ່າວແລ້ວ, ທ່ານ ບັນດິດ. ສຈ ບໍ່ວຽງຄໍາ ວົງດາລາ, ລັດຖະມົນຕີ ກວຕ; ທ່ານ ຫວ່າງ ເຫວິນ ທ່ຽນ, ເອກອັກຄະລັດຖະທູດ ແຫ່ງ ສປ ຈີນ ປະຈຳລາວ; ທ່ານ ສຈ. ດຣ. ຈຽງ ຢົງເຫວີນ, ອະທິການບໍດີ ມະຫາວິທະຍາໄລ ສ້າງຄູຢຸນນານ, ສປ ຈີນ ແລະ ທ່ານ ນ. ໄມຕີ ວົງຄຳຊາວ, ຫົວໜ້າສະຖາບັນພະລັງານທົດແທນ ແລະ ວັດສະດຸໃໝ່, ກວຕ ກໍໄດ້ໃຫ້ກຽດຂຶ້ນຕັດແຖບຜ້າ ເປີດຫ້ອງທົດລອງຂອງ ໂຄງການຮ່ວມມືສ້າງຫ້ອງທົດລອງ ລາວ-ຈີນ ເພື່ອພັດທະນາ ແລະ ການນຳໃຊ້ພະລັງງານທົດແທນ ຢ່າງເປັນທາງ.

ບັນດາ ທ່ານຮອງລັດຖະມົນຕີ, ຫົວໜ້າຫ້ອງການ, ຫົວໜ້າກົມ, ສະຖາບັນພາຍໃນກະຊວງ, ບັນດາແຂກທີ່ຖືກເຊີນຈາກຄະນະວິສະວະກຳສາດ, ຄະນະວິທະຍາສາດ ມຊ ແລະ ຈາກ ກະຊວງພະລັງງານ ແລະ ບໍ່ແຮ່ ພ້ອມດ້ວຍພະນັກງານພາຍໃນສະຖາບັນ ເຂົ້າຮ່ວມພິທີດັ່ງກ່າວ.

 

ບົດຂ່າວ: ບາລະຄອນ ສຸວັນນະພາສີ

ຮູບພາບ: ທັດສະນີ ພົງບັນດິດ

1413162627