Alternative flash content

To view this Flash you need Javascript on your browser and updated version of flash player.

Get Adobe Flash player

ແນະນຳ ກ.ວ.ຕ (MOST)

ລົງທະບຽນຜູ້ໃຊ້



Home ຂ່າວສານ ຂ່າສານ ການເຄື່ອນໄຫວວຽກງານຕ່າງໆ ກວຕ ເຊື່ອມຊຶມວັນປະກາດເອກະລາດຄົບ ຮອບ 72 ປີ ແລະ ວັນສຳຄັນຕ່າງໆ

ກວຕ ເຊື່ອມຊຶມວັນປະກາດເອກະລາດຄົບ ຮອບ 72 ປີ ແລະ ວັນສຳຄັນຕ່າງໆ

altກະຊວງວິທະຍາສາດ ແລະ ເຕັກໂນໂລຊີ (ກວຕ) ໄດ້ຈັດພິທີ ປາຖະກະຖາວັນປະກາດເອກະລາດ ຄົບຮອບ 72

ປີ, ລະນຶກວັນສາກົນ ແລະ ວັນສັບປະດາແຫ່ງຊາດ ເພື່ອລຶບລ້າງຄວາມທຸກຍາກ ຂຶ້ນໃນຕອນເຊົ້າຂອງວັນທີ 2 ພະຈິກ 2017 ທີ່ ກວຕ ໂດຍການເປັນປະທານຂອງ ທ່ານ ຫຸມພັນ ອິນທະຣາດ, ຄະນະພັກ, ຮອງລັດຖະມົນຕີ ກວຕ.

ໂອກາດນີ້, ທ່ານ ຮອງລັດຖະມົນຕີ ໄດ້ກ່າວເຖິງວັນປະກາດເອກະລາດ ຄົບຮອບ 72 ປີ (12/10/1945-12/10/2017) ວ່າ: ກ່ອນໜ້ານີ້ ຄືວັນທີ 12 ຕຸລາ 1945 ໄດ້ມີການໂຮມຊຸມນຸມໃຫຍ່ຢູ່ວຽງຈັນ ເພື່່ອປະ ກາດຄວາມເປັນເອກະລາດຂອງຊາດລາວ ເປັນຄັ້ງທໍາອິດຈາກແອກປົກຄອງຂອງພວກລ່າເມືອງຂຶ້ນ ແລະ ພວກ ຮຸກຮານຕ່າງຊາດ. ວັນດັ່ງກ່າວນັ້ນ ໄດ້ເປັນຂີດໝາຍແຫ່ງໄຊຊະນະຂອງການຕໍ່ສູ້ອັນພິລະອາດຫານ, ດ້ວຍຄວາມ ສາມັກຄີ ແລະ ການເສຍສະຫຼະອັນໃຫຍ່ຫຼວງຂອງກອງທັບ ແລະ ປະຊາຊົນເຮົາ ພາຍໃຕ້ການນຳພາຂອງພັກປະ ຊາຊົນ ປະຕິວັດລາວ.

ທ່ານ ຮອງລັດຖະມົນຕີ ໄດ້ຍົກໃຫ້ເຫັນບັນດາເຫດການສຳຄັນຢູ່ພາຍນອກ ແລະ ພາຍໃນທີ່ສ້າງເງື່ອນໄຂໃຫ້ແກ່ການປະກາດເອກະລາດ 12 ຕຸລາ 1945 ຊຶ່ງທ່ານ ໄດ້ກ່າວວ່າ: ໃນທ້າຍສັດຕະວັດທີ 19, ພວກລ່າເມືອງຂຶ້ນ ໄດ້ເຂົ້າມາຮຸກຮານ ແລະ ຢຶດຄອງເອົາປະເທດພວກເຮົາ ເປັນຫົວເມືອງຂຶ້ນ; ປະເທດລາວ ໄດ້ສູນເສຍ ເອກະລາດ; ປະຊາຊົນລາວ ຂາດອິດສະຫຼະພາບ ກາຍເປັນຂ້ອຍຂ້າຂອງຕ່າງຊາດ. ດ້ວຍມູນເຊື້ອທີ່ບໍ່ຍອມຈໍານົນ, ປະຊາຊົນລາວບັນດາເຜົ່າ ໄດ້ລຸກຮື້ຂຶ້ນຕໍ່ສູ້ຕ້ານພວກລ່າ ເມືອງຂຶ້ນ ຝຣັ່ງຢ່າງເນື່ອງນິດລຽນຕິດ ຕັ້ງແຕ່ມື້ທໍາອິດທີ່ພວກເຂົາ ໄດ້ເຂົ້າມາຮອດປະເທດລາວ. ຍິ່ງພວກລ່າເມືອງຂຶ້ນ ໄດ້ເພີ່ມທະວີການຢຶດຄອງ ແລະ ປຸກລະດົມຫຼາຍຂຶ້ນ ເທົ່າໃດ, ການຕໍ່ສູ້ຂອງປະຊາຊົນບັນດາເຜົ່າ ຍິ່ງເປີດກວ້າງອອກໄປທົ່ວທຸກແຫ່ງຫົນໃນຂອບເຂດທົ່ວປະເທດ.

ທ່ານ ຮອງລັດຖະມົນຕີກ່າວວ່າ: ພາຍຫຼັງມະຫາປະຕິວັດເດືອນ ຕຸລາ ປີ 1917 ໄດ້ຮັບໄຊຊະນະ ແລະ ສະຫະພາບໂຊວຽດ ໄດ້ເກິດເປັນລັດສັງຄົມນິຍົມລັດ ທຳອິດໃນໂລກ ແລະ ພາຍຫຼັງທີ່ປະທານ ໂຮ່ຈິມິນ ໄດ້ຄົ້ນພົບສັດຈະທຳທີ່ວ່າ “ຢາກກູ້ຊາດ ແລະ ປົດປ່ອຍຊາດ ມັນບໍ່ມີເສັ້ນທາງອື່ນໃດນອກຈາກເສັ້ນທາງຂອງການປະຕິ ວັດ ກຳມະຊີບ”, ຂະບວນການປະຕິວັດຂອງອິນດູຈີນຕິດພັນກັບຂະບວນການປະຕິວັດໂລກ ແລະ ເຕີບໃຫຍ່ຂຶ້ນຢ່າງວ່ອງໄວ.

ໃນປີ 1930, ພັກກອມມູນິດອິນດູຈີນ ໄດ້ກຳເນີດເກີດຂຶ້ນ, ເຮັດໃຫ້ການຕໍ່ສູ້ຂອງປະຊາຊົນບັນດາປະເທດໃນອິນດູຈີນມີແນວທາງ ແລະ ມີຍຸດທະສາດອັນຈະ ແຈ້ງ; ການຕໍ່ສູ້ຂອງປະຊາຊົນບັນດາເຜົ່າໄດ້ກ້າວສູ່ໄລຍະໃໝ່, ດ້ວຍຄຸນນະພາບອັນໃໝ່ພາຍໃຕ້ການນຳພາ-ຊີ້ນຳຂອງອົງຄະນະພັກແຄວັນລາວ. ບັນດານັກຮົບກອມມູນິດ ລຸ້ນທຳອິດຂອງລາວເຮົາ ໄດ້ເອົາຕົວເຈືອຈານເຂົ້າກັບປະຊາຊົນບັນດາເຜົ່າຢູ່ຮາກຖານ ແລະ ໄດ້ດຳເນີນການໂຄສະນາຂົນຂວາຍ ແລະ ຈັດຕັ້ງຮາກຖານປະຕິວັດຂຶ້ ແບບ ປິດລັບຢູ່ຫຼາຍບ່ອນ ເຊັ່ນ: ຢູ່ບໍ່ແຮ່, ໂຮງຈັກໂຮງງານ, ໃນໂຮງຮຽນ, ໃນຕົວເມືອງ, ໃນຊົນນະບົດ, ຄ້າຍທະຫານ; ໄດ້ເຕົ້າໂຮມ ແລະ ຈັດຕັ້ງນຳພາປະຊາຊົນ, ບັນດາຊັ້ນຄົນ ລຸກຂຶ້ນຕໍ່ສູ້ຕ້ານພວກລ່າເມືອງຂຶ້ນ ຝຣັ່ງຢ່າງພິລາດອາດຫານ, ເນື່ອງນິດລຽນຕິດ ແລະ ນັບມື້ນັບເຕີບໃຫຍ່ຂະຫຍາຍຕົວຢ່າງກວ້າງອອກໄປໃນທົ່ວປະເທດ. ໃນຂະນະດຽວ ກັນນັ້ນ, ການຈັດຕັ້ງນຳພາ-ຊີ້ນຳ ກໍມີລັກສະນະລວມສູນເປັນເອກະພາບ, ມີຍຸດທະວິທີທີ່ຄ່ອງແຄ້ວ ມີຍຸດທະສາດອັນຈະແຈ້ງ ແລະ ມີແກນນຳທີ່ສະຫຼຽວສະຫຼາດເຂັ້ມ ແຂງ.

ເມື່ອກາລະໂອກາດໄດ້ມ່າເຖິງ ເຊັ່ນ: ໃນປີ 1945 ທີ່ກອງທັບແດງໂຊວຽດໄດ້ຜາບແພ້ພວກຟາດຊິດເຟຍລະມັນໃນສົງຄາມໂລກຄັ້ງທີສອງ. ສ່ວນຢູ່ຫວຽດນາມ, ການປະຕິວັດເດືອນສິງຫາ ໄດ້ຮັບໄຊຊະນະ ແລະ ໄດ້ສ້າງຕັ້ງ ສາທາລະນະລັດ ປະຊາທິປະໄຕ ຫວຽດນາມ ຂຶ້ນ (ໃນວັນທີ2/9/1945).

ພັກເຮົາ ໄດ້ເດັດດ່ຽວນຳພາປະຊາຊົນເຮົາ ລຸກຂຶ້ນຢຶດອຳນາດການປົກຄອງໃນທົວປະເທດຈາກກຳມືຂອງພວກຂຸນເສີກຍີ່ປຸ່ນ ແລະ ພວກລ່າເມືອງຂຶ້ນຝຣັ່ງ. ຂະບວນການຢຶດອຳນາດຢູ່ວຽງຈັນ ໄດ້ເລີ່ມຈາກຂະບວນການຕໍ່ສູ້ຂອງກຳມະກອນ ແລະ ຕໍ່ມາໃນວັນທີ 23 ສິງຫາ 1945 ຈຶ່ງມີການໂຮມຊຸມນຸມໃຫຍ່ທີ່ມີຄົນເຂົ້າຮ່ວມ ໝື່ນກວ່າຄົນ ໂດຍມີຕົວແທນຂອງກໍາລັງປະຕິວັດເປັນແກນສານນຳພາ ແລະ ປຸກລະດົມມວນຊົນ ສາມັກຄີກັນເດັດດ່ຽວຕໍ່ສູ້ກູ້ເອົາເອກະລາດ ແລະ ອິດສະລະພາບອັນແທ້ ຈິງມາໃຫ້ປະເທດຊາດ.

ຈາກເຫດການດັ່ງກ່າວນັ້ນ, ຂະບວນການຢຶດອຳນາດໄດ້ແຜ່ລາມໄປຫຼາຍແຂວງ ເຊັ່ນ: ຢູ່ແຂວງສະຫວັນນະເຂດ ໃນວັນທີ 30 ສິງຫາ, ຢູ່ທ່າແຂກ ໃນວັນທີ 1 ກັນຍາ, ຢູ່ຊຳເໜືອແຕ່ວັນທີ 26 ສິງຫາ ເຖິງຕົ້ນເດືອຕຸລາ ແລະ ຢູ່ແຂວງອື່ນໆ ຊຶ່ງໄດ້ສ້າງເງື່ອນໄຂໃນແກ່ການລຸກຮື້ຂຶ້ນຢຶດອຳນາດ ຈາກພວກລ່າເມືອງຂຶ້ນ ແລະ ປະກາດ ເອກະລາດແຫ່ງຊາດ.

ວັນທີ 12 ຕຸລາ 1945 ໄດ້ກາຍເປັນເຫດການທີ່ມີຄວາມໝາຍປະຫວັດສາດຂອງຊາດລາວເຮົາຍ້ອຍວ່າ ແມ່ນມື້ທີ່ມີການໂຮມຊຸມນຸມ ທີ່ສະໜາມກິລາແຫ່ງຊາດ (ສະໜາມກິລາເຈົ້າອານຸວົງໃນປັດຈຸບັນ) ຊຶ່ງມີມວນຊົນເຂົ້າຮ່ວມກວ່າ 2 ໝື່ນຄົນ. ໃນມື້ນັ້ນ, ລັດຖະບານລາວອິດສະຫຼະໄດ້ເປັນຕົວແທນໃຫ້ແກ່ວົງຄະນະຍາດແຫ່ງຊາດ ປະກາດຄວາມເປັນເອກະລາດຂອງປະເທດລາວ ຕໍ່ໂລກຢ່າງເປັນທາງການ, ປະກາດໂຮມແຜ່ນດິນລາວເປັນເອກະພາບ; ພ້ອມກັນນັ້ນ ກໍໄດ້ອອກຖະແຫຼງການກ່ຽວກັບ ການປ່ຽນແປງການປົກຄອງ, ລົບລ້າງທຸກໆສັນຍາທີ່ລາວເຊັນກັບຝຣັ່ງເສດ, ປະກາດໃຊ້ລັດຖະທຳມະນູນສະບັບທຳອິດ, ປະກາດໃຊ້ທຸງຊາດ (ທຸງຊາດລາວປັດຈຸບັນ); ປະ ກາດແຕ່ງຕັ້ງຄະນະລັດຖະບານຊົ່ວຄາວ ຊຶ່ງມີສະເດັດເຈົ້າ ສຸພານຸວົງ ຕັ້ງເປັນລັດຖະມົນຕີວ່າການ ກະຊວງການຕ່າງປະເທດ ແລະ ຕໍ່ມາໄດ້ດຳລົງຕຳແໜ່ງເປັນຜູ້ບັນຊາ ການທະຫານສູງສຸດອີກດ້ວຍ.

ການປະກາດເອກະລາດວັນທີ 12 ຕຸລາ 1945 ໄດ້ເຮັດໃຫ້ຊາວໂລກໄດ້ຮັບຮູ້ກ່ຽວກັບຄວາມເປັນຊາດລາວຂອງພວກເຮົາ, ກໍຄືຮັບຮູ້ອະທິປະໄຕ ຂອງຊາດລາວ ກໍຄືເຂດນໍ້າແດນດິນຂອງປະເທດລາວ; ພ້ອມກັນນັ້ນກໍຮັບຮູ້ລັດຖະບານຊົ່ວຄາວຂອງລາວ ແລະ ຮັບຮູ້ວ່າຊາດລາວ-ຄົນລາວກໍເປັນຄົນທີ່ມີກຽດສັກສີເໝືອນຄົນຊາດອື່ນໆ ແລະ ຢາກມີອິດສະຫຼະພາບ, ເປັນເຈົ້າຊາຕາກຳຂອງຕົນເອງ ແລະ ຢາກມີການພັດທະນາຕົນເພື່ອຄວາມຢູ່ດີກິນດີ ແລະ ຄວາມຈະເລີນວັດທະນາ. ຍ້ອນແນວນັ້ນ, ພວກເຮົາຈຶ່ງຖືເອົາວັນປະກາດເອກະລາດ 12 ຕຸລາ 1945 ເປັນວັນປະຫວັດສາດທີ່ສຳຄັນຂອງຊາດ, ເປັນວັນແຫ່ງຄວາມເອກອ້າງທະນົງໃຈຕໍ່ຄວາມອາດຫານຊານໄຊໃນ ການຕໍ່ສູ້ບົນຈິດໃຈ “ຍອມຕາຍດີກວ່າເປັນຂ້ອຍຂ້າ, ຕາຍເພື່ອເອກະລາດດີກວ່າຢູ່ພາຍໃຕ້ແອກປົກຄອງຂອງຕ່າງຊາດ”; ຈາກນັ້ນມາ, ນໍ້າໃຈວັນທີ 12 ຕຸລາ ຈຶ່ງກ່າຍເປັນ ມູນເຊື້ອແຫ່ງການຕໍ່ສູ້ມີໄຊ ຂອງຄົນລາວຜູ້ຮັກຊາດພາຍໃຕ້ການນຳພາຂອງພັກ, ສາມາດປົດປ່ອຍຊາດໄດ້ຢ່າງສົມບູນ ແລະ ໄດ້ສະຖາປະນາ ສາທາລະນະລັດ ປະຊາທິປະ ໄຕ ປະຊາຊົນລາວ ໃນວັນທີ 2 ທັນວາ ປີ 1975.

ໂອກາດນີ້, ທ່ານ ຮອງລັດຖະມົນຕີ ກວຕ ໄດ້ຮຽກຮ້ອງມາຍັງຜູ້ເຂົ້າຮ່ວມ ສືບຕໍ່ເສີມຂະຫຍາຍມູນເຊື້ອ 12 ຕຸລາ ດ້ວຍການເພີ່ມທະວີນໍ້າໃຈຮັກຊາດ ແລະ ພັດ ທະນາ; ຄະນະພັກທຸກຂັ້ນ ຕ້ອງເອົາໃຈໃສ່ ໂຄສະນາສຶກສາອົບຮົມການເມືອງ-ແນວຄິດ ຂອງພະນັກງານ, ສະມາຊິກພັກ ແລະ ປະຊາຊົນບັນດາຊັ້ນຄົນ ທີ່ຂຶ້ນກັບການນຳ ພາ-ຄຸ້ມຄອງຂອງຕົນ, ໃຫ້ເຊີດຊູນໍ້າໃຈຮັກຊາດ ຕິດພັນກັບການຊຸກຍູ້ການພັດທະນາໃຫ້ດຳເນີນໄປຢ່າງຕັ້ງໜ້າ ແລະ ເປັນຂະບວນການຕໍ່ເນື່ອງ.

ໂອກາດດຽວກັນນີ້, ທ່ານ ຮອງລັດຖະມົນຕີ ກວຕ ໄດ້ສືບຕໍ່ເຜີຍແຜ່ເອກະສານ ເນື່ອງໃນໂອກາດສະເຫຼີມສະຫຼອງວັນອາຫານໂລກ, ວັນສາກົນ ແລະ ວັນສັບ ປະດາແຫ່ງຊາດ ເພື່ອລຶບລ້າງຄວາມທຸກຍາກ ປີ 2017 ອີກດ້ວຍ.

ເຂົ້າຮ່ວມໃນພິທີຄັ້ງນີ້ ມີ ຫົວໜ້າຫ້ອງການ, ກົມ, ສະຖາບັນ ແລະ ພະນັກງານພາຍໃນ ກວຕ ຈຳນວນ 100 ກວ່າຄົນ.

ຂ່າວ: ບາລະຄອນ ສູວັນນະພາສີ

ຮູບພາບ: ບູນທັນ ນັນທະວົງ

altaltalt