Alternative flash content

To view this Flash you need Javascript on your browser and updated version of flash player.

Get Adobe Flash player

ແນະນຳ ກ.ວ.ຕ (MOST)

ລົງທະບຽນຜູ້ໃຊ້

Home ຂ່າວສານ ຂ່າສານ ການເຄື່ອນໄຫວວຽກງານຕ່າງໆ ລັດຖະມົນຕີ ກວຕ ຖະແຫຼງເນື່ອງໃນວັນວິທະ ຍາສາດ ແຫ່ງຊາດ

ລັດຖະມົນຕີ ກວຕ ຖະແຫຼງເນື່ອງໃນວັນວິທະ ຍາສາດ ແຫ່ງຊາດ

There are no translations available.

altທ່ານ ບັນດິດ ສຈ. ບໍ່ວຽງຄໍາ ວົງດາລາ, ກໍາມະ ການສູນກາງພັກ, ລັດຖະມົນຕີ ກະຊວງ ວິທະຍາ

ສາດ ແລະ ເຕັກໂນໂລຊີ, ປະທານ ສະພາວິທະຍາສາດ ແຫ່ງຊາດ ໄດ້ຖະແຫຼງຂ່າວເນື່ອງໃນ ວັນວິທະຍາສາດ ແຫ່ງຊາດ, 12 ຕຸລາ 2017 ຊຶ່ງມີເນື້ອໃນວ່າ:ວັນທີ 12 ຕຸລາ ເປັນວັນປະກາດເອກະ ລາດ ແລະ ວັນວິທະຍາສາດແຫ່ງຊາດລາວເຮົາ ໄດ້ໝູນວຽນມາອີກວາລະໜຶ່ງ, ເນື່ອງໃນໂອກາດອັນສະຫງ່າລາ ສີນີ້, ຂ້າພະເຈົ້າ ຂໍສະແດງຄວາມຮູ້ບຸນຄຸນເປັນຢ່າງສູງ ແລະ ຂໍອວຍພອນໄຊອັນປະເສີດມາຍັງບັນດາທ່ານຜູ້ນໍາ ພັກ-ລັດ, ບັນດານັກປະຕິບັດອາວຸໂສ, ນັກວິທະຍາສາດ, ນັກຄົ້ນຄວ້າ, ນັກສຶກສາ, ນັກຮຽນຮູ້-ປັນຍາຊົນ ແລະ ຊາວຜູ້ອອກແຮງງານ ປະຊາຊົນລາວບັນດາເຜົ່າທຸກທົ່ວໜ້າ ຢ່າງສຸດອົກສຸດໃຈ.

ໃນໄລຍະຜ່ານມາ ພັກແລະລັດ ໄດ້ເອົາໃຈໃສ່ຕໍ່ການພັດທະນາວຽກງານວິທະຍາສາດ ແລະ ເຕັກໂນໂລ ຊີ ຂອງປະເທດເຮົາຢ່າງຈົດຈໍ່ ຊຶ່ງສະແດງອອກ ໃນແນວທາງນະໂຍບາຍຂອງພັກ, ບັນດາກົດໝາຍ ແລະ ແຜນ ພັດທະນາເສດຖະກິດ-ສັງຄົມ ແຫ່ງຊາດ ໃນແຕ່ລະໄລຍະນັ້ນໄດ້ເລັງໃສ່ການພັດທະນາຊັບພະຍາກອນມະນຸດ ແລະ ການສ້າງພື້ນຖານໂຄງລ່າງ ສໍາລັບການຄົ້ນຄວ້າ- ພັດທະນາ ແລະ ນໍາໃຊ້ຄວາມກ້າວໜ້າທາງວິທະຍາສາດ ແລະ ເຕັກໂນໂລຊີ ເພື່ອຮັບໃຊ້ການພັດທະນາ ຢູ່ປະເທດເຮົາ, ອັນພົ້ນເດັ່ນທີ່ສຸດແມ່ນ ການສ້າງຕັ້ງ ກະຊວງ ວິທະຍາສາດ ແລະ ເຕັກໂນໂລຊີ ຂຶ້ນໃນເດືອນກັນຍາ ປີ 2011 ໄດ້ກາຍເປັນບາດກ້າວກະໂດດໃໝ່ ໃຫ້ແກ່ການສ້າງປະຖົມປັດໃຈຕົ້ນຕໍ ເພື່ອພັດທະນາວິທະຍາສາດ ແລະ ເຕັກໂນໂລຊີ ຢູ່ປະເທດເຮົາ. ເລີ່ມຈາກນັ້ນເປັນຕົ້ນມາ ຄະນະພັກ ແລະ ຄະນະນຳ ກະຊວງວິທະຍາສາດ ແລະ ເຕັກໂນໂລຊີ ໄດ້ຊີ້ນຳ-ນຳພາ ສະມາຊິກພັກ-ພະນັກງານ ລັດຖະກອນໃນທົ່ວຂະແໜງການ ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ IX ແລະ ຄັ້ງທີ່ X ຂອງພັກຢ່າງເປັນຂະບວນຝົດຟື້ນ, ພ້ອມກັນຜ່ານຜ່າຄວາມ ຫຍຸ້ງ ຍາກນາໆປະການ ຈັດຕັ້ງປະຕິບັດໜ້າທີ່ໃໝ່, ໜັກໜ່ວງ ແລະ ມີກຽດ ທີ່ພັກ ແລະ ລັດ ມອບໝາຍໃຫ້. ມາເຖິງປະຈຸບັນນີ້ ວຽກງານການຈັດຕັ້ງ ຂອງຂະແໜງການ ວິທະຍາສາດ ແລະ ເຕັກໂນໂລຊີ ແຕ່ສູນກາງເຖິງທ້ອງຖິ່ນ ໄດ້ຮັບການປັບປຸງ ແລະ ພັດທະນາຢ່າງເປັນລະບົບ,ຢູ່ຂັ້ນກະຊວງ ມີ 2 ຫ້ອງການ, 8 ກົມ ແລະ 4 ສະຖາບັນ ຊຶ່ງຮັບຜິດຊອບເຮັດໜ້າທີ່ການເມືອງເປັນເສນາທິການໃຫ້ລັດຖະບານ ໃນການສົ່ງເສີມນຳໃຊ້ ແລະ ຄົ້ນຄວ້າພັດທະນາ ວິທະຍາສາດ, ເຕັກໂນໂລຊີ ແລະ ນະວັດຕະກຳ, ຊັບສິນທາງປັນຍາ, ມາດຕະຖານ ແລະ ວັດແທກໃນທົ່ວ ສປປ ລາວ. ຢູ່ບັນດາແຂວງ ແລະ ນະຄອນຫຼວງ ກໍ່ໄດ້ມີການປັບປຸງ ພະແນກວິທະຍາສາດ ແລະ ເຕັກໂນໂລຊີ ໃຫ້ເຂັ້ມແຂງ, ໄດ້ສ້າງຕັ້ງຫ້ອງການວິທະຍາສາດ ແລະ ເຕັກໂນໂລຊີ ຢູ່ໃນບັນດາເມືອງຈຸດສຸມພັດທະນາ ທີ່ມີເງື່ອນໄຂ. ຂະແໜງວິທະຍາສາດ ແລະ ເຕັກໂນໂລຊີ ໄດ້ຕັ້ງໜ້າ ຢ່າງຫ້າວຫັນປະກອບສ່ວນເຂົ້າໃນການຈັດຕັ້ງປະຕິບັດວຽກງານກໍ່ສ້າງຮາກຖານການເມືອງ ແລະ ວຽກງານ 3 ສ້າງ ຕາມມະຕິ ຂອງກົມການເມືອງສູນກາງພັກ ດ້ວຍການສົ່ງໜ່ວຍງານວິຊາການລົງຊ່ວຍແຂວງ, ເມືອງ ແລະ ບ້ານ ຕາມເນື້ອໃນຈິດໃຈ ຂອງວຽກງານ 3 ສ້າງ.

ກະຊວງວິທະຍາສາດ ແລະ ເຕັກໂນໂລຊີ ໄດ້ຄົ້ນຄວ້າ ສ້າງ ແລະ ປັບປຸງກົດໝາຍ 08 ສະບັບ ແລະ ນິຕິກໍາລຸ່ມກົດໝາຍ ອີກຈໍານວນໜຶ່ງ, ໄດ້ດໍາເນີນກອງ ປະຊຸມນັກວິທະຍາສາດທໍາມະຊາດ ທົ່ວປະເທດ ຄັ້ງທີ l ຊຶ່ງເປັນຄັ້ງປະຫວັດສາດ ຂອງ ປະເທດເຮົາ ສຳເລັດຜົນຢ່າງສະຫງ່າງາມ, ໄດ້ດໍາເນີນກອງປະຊຸມວຽກງານ ວິທະຍາສາດ ແລະ ເຕັກໂນໂລຊີ ສໍາເລັດແລ້ວ 2 ຄັ້ງ ແລະ ໄດ້ສ້າງແຜນຍຸດທະສາດການພັດທະນາວິທະຍາສາດ ແລະ ເຕັກໂນໂລຊີ ເຖິງ ປີ 2030 ຊຶ່ງເປັນແຜນຍຸດທະ ສາດການພັດທະນາ ທີ່ສາມາດເຊື່ອມສານ ກັບການພັດທະນາຂອງບັນດາກະຊວງຂະແໜງການ ກໍ່ຄື ພາກພື້ນ ແລະ ສາກົນ ໃນໄລຍະໃໝ່ແຫ່ງການພັດທະນາແບບ ຍືນຍົງ.

ສໍາລັບການພັດທະນາດ້ານພື້ນຖານໂຄງລ່າງ ກໍໄດ້ສໍາເລັດການກໍ່ສ້າງສະຖາບັນນິເວດວິທະຍາ ແລະ ເຕັກໂນໂລຊີຊີວະພາບ ຊື່ງປະກອບດ້ວຍບັນດາຫ້ອງທົດ ລອງທີ່ທັນສະໄໝ, ສຳເລັດການສ້າງສູນຂໍ້ມູນເອເລັກໂຕຼນິກຂະໜາດໃຫຍ່ ເຖິງ 400 TB ທີ່ນຳໃຊ້ເຕັກໂນໂລຊີ ທັນສະໄໝຂອງປະເທດຢີ່ປຸ່ນ ຊື່ງເປັນສູນຂໍ້ມູນເອເລັກ ໂຕຣນິກແບບປະຫຍັດພະລັງງານ ແລະ ທັນສະໄໝທີ່ສຸດ ຢູ່ໃນປະເທດເຮົາ ກໍ່ຄື ໃນພາກພື້ນອາຊີອາຄະເນ. ສໍາເລັດການສ້າງສູນຝຶກອົບຮົມພະນັກງານ ຂະແໜງວຽກ ງານວິທະຍາສາດ ແລະ ເຕັກໂນໂລຊີ ຊຶ່ງຈະເປັນບ່ອນຍົກລະດັບ ບໍາລຸງສ້າງ ບຸກຄະລາກອນດ້ານວິທະຍາສາດ ແລະ ເຕັກໂນໂລຊີ ຢູ່ພາຍໃນປະເທດ ທີ່ຕິດພັນກັບການ ຄົ້ນຄວ້າ-ພັດທະນາ, ການຖ່າຍທອດ ແລະ ການດັດປັບນໍາໃຊ້ວິທະຍາສາດ ແລະ ເຕັກໂນໂລຊີ ລວມທັງ ການສົ່ງເສີມຫົວຄິດປະດິດສ້າງ, ສ້າງບຸກຄະລາກອນທີ່ເປັນ ມືອາຊີບທາງດ້ານວິຊາການ ເພື່ອສາມາດຄຸ້ມຄອງ ແລະ ຄົ້ນຄວ້າ-ພັດທະນາ ວິທະຍາສາດ ແລະ ເຕັກໂນໂລຊີ ໃນໄລຍະໃໝ່.

ໃນດ້ານການບໍລິການວິທະຍາສາດ ແລະ ເຕັກໂນໂລຊີ, ເປັນຕົ້ນແມ່ນ ດ້ານຊັບສິນທາງປັນຍາ, ມາດຕະຖານ ແລະ ວັດແທກກໍ່ໄດ້ຮັບການປັບປຸງຍົກ ລະດັບ ໃຫ້ດີຂຶ້ນ ເພື່ອໃຫ້ການບໍລີການແກ່ສັງຄົມ ຢ່າງກວ້າງຂວາງເຖິງຮາກຖານທ້ອງຖິ່ນ, ໃນນັ້ນ ໄດ້ໃຫ້ຄໍາປຶກສາ, ຮັບຄໍາຮ້ອງຂໍຈົດທະບຽນຊັບສິນອຸດສາຫະກໍາ, ແຈ້ງຂໍ້ມູນ ລິຂະສິດ ແລະສິດກ່ຽວຂ້ອງກັບລິຂະສິດ. ແກ້ໄຂຂໍ້ຂັດແຍ່ງຊັບສິນທາງປັນຍາ ໄດ້ທັງໝົດ 2,600 ກວ່າສະບັບ; ໄດ້ສ້າງຕັ້ງຫ້ອງກວດສອບຄຸນນະພາບນໍ້າມັນເຊື້ອໄຟ ປະຈໍາຢູ່ບັນດາດ່ານສາກົນ ສ້າງຫ້ອງກວດກາເຄື່ອນທີ່ ແລະ ຫ້ອງກວດກາລະບັບສູນກາງ ຊຶ່ງສາມາດເພີ່ມລາຍຮັບພາສີອາກອນນໍ້າມັນ ແລະ ຮັບປະກັນໃຫ້ສັງຄົມໄດ້ຊົມ ໃຊ້ນໍາມັນທີ່ມີຄຸນນະພາບ, ປົກປັນຮັກສາສິ່ງແວດລ້ອມ. ໄດ້ກວດສອບກົງເຕີ ໄຟຟ້ານໍາເຂົ້າມາໃໝ່ ຈໍານວນ 247,000 ກວ່າໜ່ວຍ ແລະ ໃຫ້ການບໍລິການ ການຖ່າຍ ທອດເຕັກໂນໂລຊີດ້ານຕ່າງໆອີກດ້ວຍ. ພ້ອມກັນນັ້ນ ຍັງໄດ້ເພີ່ມທະວີ ວຽກງານໂຄສະນາເຜີຍແຜ່ແນວທາງນະໂຍບາຍຂອງພັກ ແລະ ລັດ ກ່ຽວກັບວຽກງານວິທະຍາ ສາດ ແລະ ເຕັກໂນໂລຊີ ດ້ວຍຫຼາຍຮູບການ ເປັນຕົ້ນແມ່ນຈັດງານວາງສະແດງ ແລະ ສ້າງກິດຈະກໍາຕ່າງໆ ໃນໂອກາດສະເຫຼີມສະຫຼອງວັນລະນຶກທີ່ສໍາຄັນແຫ່ງຊາດ, ປັບປຸງຍົກລະດັບຖານຂໍ້ມູນ ແລະ ສ້າງເວັບໄຊທ໌ ຂອງກະຊວງ, ໃຫ້ການບໍລິການຫ້ອງສະໝຸດວິທະຍາສາດ ແລະ ເຕັກໂນໂລຊີ, ໜັງສືພີມ ວິທະຍາສາດ ແລະ ການພັດທະນາ, ວາລະສານເຄື່ອງໝາຍການຄ້າ ອອກຮັບໃຊ້ມວນຊົນຢ່າງຕໍ່ເນື່ອງ; ຈັດປະຊຸມສໍາມະນາ-ວິຊາການ ແລະ ການປາຖະກະຖາກ່ຽວກັບວິທະຍາສາດ, ເຕັກໂນໂລຊີ ແລະ ນະວັດຕະກໍາ ເພື່ອເປັນຂໍ້ມູນຄວາມຮູ້ ໃຫ້ແກ່ນັກວິຊາການ, ນັກຮຽນຮູ້ ປັນຍາຊົນ ແລະ ທົ່ວສັງຄົມ ຕື່ມອີກ.

ວຽກງານພົວພັນ ແລະ ຮ່ວມມື ທາງດ້ານວິທະຍາສາດ ແລະ ເຕັກໂນໂລຊີ ກັບຕ່າງປະເທດ ກໍ່ໄດ້ມີການຂະຫຍາຍຕົວຢ່າງກວ້າງຂວາງ: ເປັນຕົ້ນແມ່ນ ໄດ້ມີການຮ່ວມມືສອງຝ່າຍ ລະຫວ່າງ ກະຊວງວິທະຍາສາດ ແລະ ເຕັກໂນໂລຊີ ສປປ ລາວ ແລະ ສສ ຫວຽດນາມ, ສປ ຈີນ, ໄທ, ຍີ່ປຸ່ນ, ກໍາປູເຈຍ, ມາເລເຊຍ...... ນອກຈາກນັ້ນ ຍັງມີການຮ່ວມມືຫຼາຍຝ່າຍໃນກອບອາຊຽນ, ຮ່ວມມືກັບ ອົງການຄົ້ນຄວ້າ-ພັດທະນາວິທະຍາສາດ ຂອງ ພາກພື້ນອາຊີ, ອົງການອຸຍແນັສໂກ ດ້ານວິ ທະຍາສາດທໍາມະຊາດ ແລະ ສິ່ງແວດລ້ອມ, ອົງການພະລັງງານປະລໍາມະນູສາກົນ, ອົງການມາດຕະຖານສາກົນ, ອົງການຊັບສິນທາງປັນຍາໂລກ ຊຶ່ງເປັນການປະກອບ ສ່ວນ ປະຕິບັດພັນທະຂອງ ສປປ ລາວ ໃນຖານະເປັນປະເທດສະມາຊິກ ຂອງບັນດາການຈັດຕັ້ງດັ່ງກ່າວ ເພື່ອຍາດແຍ່ງເອົາການສະໜັບສະໜູນຊ່ວຍເຫຼືອ ດ້ານທຶນ ຮອນ ແລະ ດ້ານເຕັກນິກວິຊາການ ໃຫ້ນັບມື້ຫຼາຍຂຶ້ນ ແລະ ເປັນເຈົ້າການ ເຊື່ອມໂຍງເຂົ້າ ໃນວົງການວິທະຍາສາດ-ເຕັກໂນໂລຊີ ຂອງສາກົນ ໃຫ້ມີປະສິດທິຜົນ. ຄຽງຄູ່ກັບຜົນງານຈໍານວນໜຶ່ງທີ່ກ່າວມານັ້ນ, ຂະແໜງວິທະຍາສາດ ແລະ ເຕັກໂນໂລຊີ ກໍຍັງມີບັນຫາຄົງຄ້າງທ້າທາຍຈໍານວນໜຶ່ງທີ່ຈະຕ້ອງໄດ້ແກ້ໄຂຜ່ານຜ່າ, ເປັນຕົ້ນ ແມ່ນ ຕ້ອງສືບຕໍ່ປັນປຸງການຈັດຕັ້ງ ແລະ ການພັດທະນາບຸກຄະລາກອນໃຫ້ເຂັ້ມແຂງ, ສືບຕໍ່ນໍາໃຊ້ເຕັກໂນໂລຊີທັນສະໄໝເຂົ້າໃນການຜະລິດສິນຄ້າ ແລະ ຫັນເປັນທັນ ສະໄໝຢູ່ປະເທດເຮົາ. ສະນັ້ນ ເພື່ອສືບຕໍ່ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ X ຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VIII ໃຫ້ປະກົດຜົນເປັນຈິງຕາມທິດພັດທະນາແບບຍືນຍົງນັ້ນ, ກະຊວງວິທະຍາສາດ ແລະ ເຕັກໂນໂລຊີ ຈະສືບຕໍ່ຈັດຕັ້ງປະຕິບັດແຜນຍຸດທະສາດການພັດທະນາວິທະຍາ ສາດ ແລະ ເຕັກໂນໂລຊີ ຂອງ ສປປ ລາວ ໄລຍະແຕ່ນີ້ ຮອດປີ 2030 ແນໃສ່ເຮັດໃຫ້ຂະແໜງວຽກງານວິທະຍາສາດ, ເຕັກໂນໂລຊີ ແລະ ນະວັດຕະກໍາ ກາຍເປັນກຳລັງ ແຮງຂັບເຄື່ອນໃຫ້ແກ່ການພັດທະນາປະເທດ ໄປຕາມທິດຫັນເປັນອຸດສາຫະກຳ ແລະ ທັນສະໄໝ ແລະ ຍືນຍົງສີຂຽວ. ໃນແຜນຍຸດທະສາດການພັດທະນາດັ່ງກ່າວ ໄດ້ກໍານົດ 6 ແຜນງານຍຸດທະສາດ ຄື: ແຜນງານ ທີ 1: ບຸກທະລຸດ້ານຈິນຕະນາການ, ເອົາໃຈໃສ່ໂຄສະນາເຜີຍແຜ່ ສ້າງຈິດສໍານຶກດ້ານວິທະຍາສາດ ແລະ ເຕັກໂນໂລຊີ ໃຫ້ແກ່ສັງຄົົມຢ່າງກວ້າງຂວາງ ແລະ ເລິກເຊິ່ງ. ແຜນງານ ທີ 2: ບຸກທະລຸປ່ຽນແປງໃໝ່ ພື້ນຖານການຈັດຕັ້ງ, ກົນໄກການຄຸ້ມຄອງ ແລະ ການເຄື່ອນໄຫວວຽກງານ ວິທະຍາສາດ ແລະ ເຕັກໂນໂລຊີ ໃຫ້ເປັນລະບົບຄົບຊຸດ ແລະ ມີປະສິດທິຜົນ. ແຜນງານ ທີື 3:ບຸກທະລຸໃນການ ພັດທະນາຊັບພະຍາກອນມະນຸດ ດ້ານວິທະຍາສາດ ແລະ ເຕັກໂນໂລຊີ ໃຫ້ຮັບປະກັນທາງດ້ານປະລິມານ ແລະ ຄຸນນະພາບ. ແຜນງານ ທີ 4: ບຸກທະລຸຄົ້ນຄວ້ານຳໃຊ້ ແລະ ພັດທະນາວິທະຍາສາດ ເຕັກໂນໂລຊີ ເຂົ້າສູ່ເຂດຈຸດສຸມບຸລິມະສິດ, ລົງສູ່ຂະແໜງການ ແລະ ທ້ອງຖິ່ນ ເພື່ອພັດທະນາເສດຖະກິດ-ສັງຄົມ ແລະ ລົບລ້າງຄວາມທຸກຍາກຂອງປະຊາຊົນລາວບັນດາເຜົ່າ. ແຜນງານ ທີ 5:ເອົາໃຈໃສ່ບໍລິການດ້ານວິທະຍາສາດ ແລະ ເຕັກໂນໂລຊີ ເພື່ອຮັບໃຊ້ສັງຄົມ ແລະ ປະຊາຊົນເຂດຫ່າງໄກສອກຫຼີກ. ແຜນງານ ທີ 6:ເປີດກວ້າງ ການພົວພັນຮ່ວມມືສາກົນ ດ້ານວິທະຍາສາດ ແລະ ເຕັກໂນໂລຊີ ຢ່າງມີຫຼັກການ ຕາມແນວທາງການຕ່າງປະເທດຂອງພັກ - ລັດ.

ພ້ອມກັນນັ້ນ, ການພັດທະນາວິທະຍາສາດ ແລະ ເຕັກໂນໂລຊີ ໃນຂະແໜງການຕ່າງໆ ເປັນປັດໃຈສໍາຄັນເພື່ອຮັບປະກັນໃຫ້ ເສດຖະກິດ-ສັງຄົມ ມີການຂະ ຫຍາຍຕົວຢ່າງຕໍ່ເນື່ອງ ແລະ ມີຄວາມໝັ້ນຄົງ. ໃນສະເພາະໜ້ານີ້ຕ້ອງໄດ້ມີການສຸມໃສ່ ການນໍາໃຊ້ວິທະຍາສາດ ແລະ ເຕັກໂນໂລຊີ ໃນບັນດາຂະແໜງການຜະລິດ, ຂະແໜງການສັງຄົມ ແລະ ການປ້ອງກັນຊາດ-ປ້ອງກັນຄວາມສະຫງົບ. ບັນຫາໜຶ່ງທີ່ສໍາຄັນຕ້ອງໄດ້ເອົາໃຈໃສ່ນັ້ນ ແມ່ນການຄົ້ນຄວ້ານໍາໃຊ້ວິທະຍາສາດ ແລະ ເຕັກໂນໂລ ຊີ ເພື່ອພັດທະນາຊົນນະບົດ ແລະ ລົບລ້າງຄວາມທຸກຍາກ. ສະນັ້ນ, ການພັດທະນາວິທະຍາສາດ ແລະ ເຕັກໂນໂລຊີ ໃນແຕ່ລະເຂດແຄວ້ນຕ້ອງໃຫ້ສອດຄ່ອງກັບທິດ ທາງລວມທີ່ກໍານົດໄວ້ໃນແຜນພັດທະນາເສດຖະກິດ-ສັງຄົມຂອງແຕ່ລະແຂວງ, ບົນພື້ນຖານເສີມຂະຫາຍທ່າແຮງ ແລະ ຈຸດພິເສດຂອງແຕ່ລະເຂດ, ແຕ່ລະພາກຂອງປະ ເທດເຮົາໃຫ້ແທດເໝາະເພື່ອໃຫ້ປະເທດເຮົາສາມາດເປັນເຈົ້າການໃນການພັດທະນາ ແລະ ເຊື່ອມໂຍງເສດຖະກິດກັບພາກພື້ນ ແລະ ສາກົນໃນເງື່ອນໄຂການປະຕິວັດອຸດ ສາຫະກໍາຄັ້ງທີ 4 ຂອງໂລກ ຫຼື ເອີ້ນຫຍໍ້ວ່າ “ຍຸກສະໄໝອຸດສາຫະກໍາ 4.0”.

ເນື່ອງໃນໂອກາດສະເຫຼີມສະຫຼອງ ວັນວິທະຍາສາດແຫ່ງຊາດ ຂອງປະເທດເຮົາ ໃນປີນີ້ອີກເທື່ອໜຶ່ງ ຂ້າພະເຈົ້າຂໍສະແດງຄວາມຮູ້ບຸນຄຸນຢ່າງເລິກເຊິ່ງມາຍັງ ບັນດາທ່ານຜູ້ນໍາ ພັກ-ລັດ, ບັນດານັກປະຕິວັດອາວຸໂສ ທີ່ຍາມໃດກໍ່ເອົາໃຈໃສ່ຊີ້ນໍາ-ນໍາພາ ແລະ ຊຸກຍູ້ສົ່ງເສີມການຄົ້ນຄວ້າ-ພັດທະນາ ແລະການນໍາໃຊ້ວິທະຍາສາດ ແລະ ເຕັກໂນໂລຊີ ເພື່ອພັດທະນາປະເທດເຮົາ ໃຫ້ມີການຂະຫຍາຍຕົວຢ່າງເນື່ອງຕະຫຼອດມາ.

ຂ້າພະເຈົ້າ ຂໍຮຽກຮ້ອງມາຍັງບັນດານັກວິທະຍາສາດ, ນັກຄົ້ນຄວ້າ, ນັກຮຽນຮູ້, ປັນຍາຊົນ ຈົ່ງສຶບຕໍ່ເສີມຂະຫຍາຍມູນເຊື້ອການຄົ້ນຄວ້າປະດິດສ້າງຂອງຕົນ ເພື່ອສູ້ຊົນປະຕິບັດໜ້າທີ່ ແລະ ຍົກລະດັບຄວາມຮູ້ຄວາມສາມາດຂອງຕົນໃຫ້ສູງຂຶ້ນ ເພື່ອປະກອບສ່ວນຢ່າງສົມກຽດເຂົ້າໃນພາລະກິດວິທະຍາສາດ ແລະ ເຕັກໂນໂລຊີ ຂອງປະເທດເຮົາ, ປະກອບສ່ວນເຂົ້າໃນການຫັນເປັນອຸດສາຫະກໍາ ແລະ ທັນສະໄໝຂອງປະເທດເຮົາ ບົນຈິດໃຈບຸກທະລຸຕາມມະຕິຂອງກອງປະຊຸມໃຫຍ່ ຄັ້ງທີ X ຂອງພັກວາງອອກ, ຫ້າວຫັນສືບຕໍ່ສ້າງຜົນງານວິທະຍາສາດ ໃນຂະບວນການແຂ່ງຂັນຮັກຊາດ ແລະ ພັດທະນາ” ແລະ ອອກແຮງຄົ້ນຄວ້າ-ພັດທະນາ ການນໍາໃຊ້ວິທະ ຍາສາດ, ເຕັກໂນໂລຊີ ແລະ ນະວັດຕະກໍາ ເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດທີ່ແສນຮັກຂອງພວກເຮົາ ໃຫ້ມີຄວາມກ້າວໜ້າພັດທະນາ ແລະ ຈະເລີນຮຸ່ງເຮືອງ ຕະຫຼອດໄປ.

ຂໍຂອບໃຈ !