Alternative flash content

To view this Flash you need Javascript on your browser and updated version of flash player.

Get Adobe Flash player

ແນະນຳ ກ.ວ.ຕ (MOST)

ລົງທະບຽນຜູ້ໃຊ້

Home ຂ່າວສານ ກອງປະຊຸມ-ສຳມະນາ ການນຳໃຊ້ ເຕັກໂນໂລຊີຂໍ້ມູນຂ່າວສານ ເຂົ້າໃນ ການຄຸ້ມຄອງບໍລິຫານລັດ ແລະ ນະວັດຕະກຳ ໃໝ່ໃນການຮັກສາຄວາມປອດໄພ

ການນຳໃຊ້ ເຕັກໂນໂລຊີຂໍ້ມູນຂ່າວສານ ເຂົ້າໃນ ການຄຸ້ມຄອງບໍລິຫານລັດ ແລະ ນະວັດຕະກຳ ໃໝ່ໃນການຮັກສາຄວາມປອດໄພ

altກົມເຕັກໂນໂລຊີຂໍ້ມູນຂ່າວສານ (ກຕຂ), ກະຊວງ ວິທະຍາສາດ ແລະ ເຕັກໂນໂລຊີ (ກວຕ) ຮ່ວມກັບ ບໍລິສັດ

ຄໍາວິເສດ ໄອຊີທີ ແລະ ບໍລິສັດ THANAWAT INTER SUPPLY, ໄດ້ຈັດກອງປະຊຸມສຳມະນາກ່ຽວກັບ ການນຳໃຊ້ ເຕັກໂນໂລຊີຂໍ້ມູນຂ່າວສານ ເຂົ້າໃນການຄຸ້ມຄອງບໍລິຫານລັດ ແລະ ນະວັດຕະກຳໃໝ່ ໃນການຮັກ ສາຄວາມປອດໄພ ຂຶ້ນໃນຕອນແລງຂອງວັນທີ 28 ກັນຍາ 2017 ທີ່ຫ້ອງປະຊຸມຂອງ ກວຕ ໂດຍການໃຫ້ກຽດ ເປັນປະທານຂອງ ທ່ານ ຫຸມພັນ ອິນທະຣາດ, ຮອງລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ.

ຈຸດປະສົງຂອງກອງປະຊຸມໃນຄັ້ງນີ້ ເປັນການນຳສະເໜີ ການນຳໃຊ້ສູນຂໍ້ມູນເອເລັກໂຕຣນິກ (Data Center) ຂອງ ກວຕ ເຂົ້າໃນການຄຸ້ມຄອງບໍລິຫານລັດ ແລະ ການສະເໜີ ກ່ຽວກັບນະວັດຕະກຳໃໝ່ ໃນການຮັກ ສາຄວາມປອດໄພຂອງ ຕຶກ, ອາຄານ, ສຳນັກງານ ແລະ ຫ້ອງການຕ່າງໆ.

ໂອກາດນີ້, ທ່ານ ຫຸມພັນ ອິນທະຣາດ, ຮອງລັດຖະມົນຕີ ກວຕ ໃຫ້ກຽດກ່າວເປິດກອງປະຊຸມໃນຄັ້ງນີ້ ຊຶ່ງມີເນື້ອໃນບາງຕອນວ່າ: ດັ່ງທີ່ພວກເຮົາຮັບຮູ້ນຳກັນ ແລ້ວວ່າ ວຽກງານວິທະຍາສາດ, ເຕັກໂນໂລຊີ ແລະ ນະວັດຕະກຳ ໂດຍລວມ ແມ່ນມີຄວາມສຳຄັນ ໃນການນຳໃຊ້ເຂົ້າໃນວຽກງານການຄົ້ນຄວ້າພັດທະນາ ໂດຍສະເພາະ ແມ່ນການພັດທະນາເສດຖະກິດ-ສັງຄົມຂອງຊາດ, ເປັນຂໍກຸນແຈ, ເປັນກໍງລັງແຮງ ແລະ ເປັນເຄື່ອງມືທີ່ຈະພັດທະນາປະເທດຊາດ ໂດຍສະເພາະ ດ້ານວຽກງານວິທະຍາສາດ ເຂົ້າໃນການພັດທະນາເສດຖະກິດ-ສັງຄົມ ແລະ ສິ່ງແວດລ້ອມ.

ດັ່ງທີ່ພວກຮູ້ນຳກັນວ່າ ການພັດທະນາວຽກງານວິທະຍາສາດ, ເຕັກໂນໂລຊີ ແລະ ນະວັດຕະກຳ ຢູ່ໃນໂລກ ມີການພັດທະນາຢ່າງກວ້າງຂວາງ ແລະ ເພື່ອກ້າວ ເຂົ້າ ສູ່ລວງເລິກ, ຍຸກຂອງການປະຕິວັດອຸດສາຫະກຳຂັ້ນ 4 ເພື່ອການພັດທະນາຢ່າງວ່ອງໄວ. ສະນັ້ນ, ເມື່ອການພັດທະນາ ໄປໄວຄືແນວນັ້ນ ຖ້າພວກເຮົາບໍ່ຍົກລະດັບ ບໍ່ຮັບຮູ້ ບໍ່ພັດທະນາ ບໍ່ຊອກຮູ້ ພວກເຮົາຈະບໍ່ທັນກັບຍຸກສະໄໝ. ວຽກງານວິທະຍາສາດ ແລະ ເຕັກໂນໂລຊີ ເປັນປັດໄຈສຳຄັນໃນການແຂ່ງຂັນໃນຕະຫຼາດໂລກ ເຊັັ່ນ: ການພັດທະນາທາງດ້ານເສດຖະກິດ, ການຄ້າ, ການບໍລິການ ເພື່ອຮັກສາສຸຂະພາບ ມີອາຍຸຍືນ ມີີຄວາມປອດໄພ, ມີຄວາມຍືນຍົງ ແລະ ມີຄວາມສີວິໄລ.

ທ່ານ ກ່າວວ່າ: ວຽກງານວິທະຍາສາດ ແລະ ເຕັກໂນໂລຊີ ແມ່ນມີຄວາມຈຳເປັນ ຊຶ່ງໃນໂລກປັດຈຸບັນນີ້ມີສິ່ງທ້າທາຍຫຼາຍຢ່າງ ເຊັ່ນ: ສະພາບວິກິດດ້ານເສດ ຖະກິດ ແລະ ການເງິນຂອງໂລກ, ເລື່ອງໄພທຳມະຊາດ, ດິນຟ້າອາກາດປ່ຽນແປງ, ລົມພະຍຸ, ແຜ່ນດິນໄຫວ, ການກໍ່ການຮ້າຍ ແລະ ອື່ນໆ.

ສ່ວນພາຍໃນປະເທດ ກໍມີປະກົດການຍໍ້ທໍ້ໃນສັງຄົມ, ການຕົວະຍົວະຫຼອກລວງ, ການໂຈລະກຳຂໍ້ມູນ, ການລັກລອບປອມແປງຕ່າງໆ ຊຶ່ງທັງໝົດທີ່ກ່າວມາ ຂ້າງເທິງນີ້ ລ້ວນແລ້ວແຕ່ເປັນໄພອັນຕະລາຍຕໍ່ຊີວິດ ແລະ ຊັບສິນ. ສະນັ້ນ, ບັນຫາຄວາມປອດໄພ ກໍເປັນບັນຫາໜຶ່ງທີ່ພວກເຮົາ ຕ້ອງໄດ້ມີການນຳໃຊ້ເຄື່ອງມືທັນສະ ໄໝໃນການຄຸ້ມຄອງບໍລິຫານລັດ ໃຫ້ເປັນການຄຸ້ມຄອງແບບທັນສະໄໝ ແລະ ຮັບປະກັນການຮັກສາຄວາມປອດໄພ.

ການສຳມະນາໃນຄັ້ງນີ້, ຜູ້ເຂົ້າຮ່ວມ ຈະໄດ້ຮັບຟັງການນຳສະເໜີກ່ຽວກັບ ການນຳໃຊ້ສູນບໍລິການຂໍ້ມູນເອເລັກໂຕຣນິກ (Data Center) ຂອງ ກວຕ ເຂົ້າໃນ ການຄຸ້ມຄອງບໍລິຫານລັດຫັນເປັນທັນສະໄໝ; ນະວັດຕະກຳໃໝ່ໃນການຮັກສາຄວາມປອດໄພ ຂອງຕຶກ, ອາຄານ, ສຳນັກງານ ແລະ ຫ້ອງການ ຊຶ່ງນຳສະເໜີໂດຍບໍລິສັດ ຄຳວິເສດ ໄອຊີທີ ທີ່ມີບົດຮຽນ ແລະ ປະສົບການດ້ານການໃຫ້ການບໍລິການທາງດ້ານໄອທີ 10 ກວ່າປີ.

ກອງປະຊຸມສຳມະນາໃນຄັ້ງນີ້ ມີ ທ່ານ ຄຳຜຸຍ ອຸໄທພອນ, ຜູ້ບໍລິຫານ ບໍລິສັດ ຄຳວິເສດ ໄອຊີທີ; ຜູ້ຕາງໜ້າຫ້ອງການ, ກົມ, ສະຖາບັນ ແລະ ມີພະນັກງານ ວິຊາການ ກ່ຽວຂ້ອງ ຈຳນວນ 40 ກວ່າທ່ານ.

ຂ່າວ: ບາລະຄອນ ສຸວັນນະພາສີ

ຮູບພາບ: ບຸນທັນ ນັນທະວົງ

altaltaltaltaltaltalt