ຂໍ້ຕົກລົງ ວ່າາດ້ວຍການຈັດຕັ້ງ ແລະ ການເຄື່ອນໄຫວຂອງ ກົມວິທະຍາສາດ

ຄວາມເປັນມາຂອງ ກົມວິທະຍາສາດ 

         ສະພາບຄວາມເປັນມາ ຂອງ ການຈັດຕັ້ງເຄື່ອນໄຫວວຽກງານມະຫາພາກ ດ້ານວິທະຍາສາດ ແລະ ເຕັກໂນໂລຊີ ໄດ້ມີຈຸດເລີ່ມ ນັບແຕ່ຊຸມປີ 1980 ເປັນຕົ້ນມາ, ຊື່ງໃນເວລານັ້ນ ເອີ້ນຊື່ວ່າ ສູນຄົ້ນຄວ້າເຕັກໂນໂລຊີ ຊື່ງນອນໃນກົງຈັກການຈັດຕັ້ງວິຊາການ ຂອງຄະນະກຳມະການ ວິທະຍາສາດ-ເຕັກນິກ ແຫ່ງລັດ. ໃນເວລາຕໍ່ມາການເຄື່ອນໄຫວ ວຽກງານມະຫາພາກ ດ້ານວິທະຍາສາດ ແລະ ເຕັກໂນໂລຊີ ໄດ້ຮັບການປັບປຸງເປັນກ້າວໆ ມາຮອດຊຸມປີ 1988 ກໍ່ໄດ້ສ້າງຕັ້ງ ເປັນກົມວິທະຍາສາດ ແລະ ເຕັກໂນໂລຊີ ຊຶ່ງເປັນກົມວິຊາການໜຶ່ງ ທີ່ສັງກັດໃນໂຄງປະກອບການຈັດຕັ້ງຂອງອົງການ ວິທະຍາສາດ ເຕັກໂນໂລຊີ ແລະ ສິ່ງແວດລ້ອມ, ຊື່ຫຍໍ້ວ່າ ອວຕສ ຫຼື STEA ຕາມດຳລັດຂອງ ນາຍົກລັດຖະມົນຕີ ເລກທີ 68/ນຍ. ຕໍ່ມາກໍ່ໄດ້ມີການປັບປຸງຊັບຊ້ອນການຈັດຕັ້ງຄືນໃຫມ່ ໂດຍແຍກເອົາວຽກງານສີ່ງແວດລ້ອມອອກແລ້ວປ່ຽນຊື່ມາເປັນ ອົງການວິທະຍາສາດ ແລະ ເຕັກໂນໂລຊີ ແຫ່ງຊາດ, ຊື່ຫຍໍ້ວ່າ ອວຕຊ ຫຼື NAST ຕາມດຳລັດຂອງ ນາຍົກລັດຖະມົນຕີ ເລກທີ 444/ນຍ, ລົງວັນທີ 24 ທັນວາ 2007. ໃນເວລານັ້ນ, ກົມວິທະຍາສາດ ແລະ ເຕັກໂນໂລຊີ ກໍ່ແມ່ນການຈັດຕັ້ງວິຊາການໜຶ່ງ ທີ່ນອນໃນໂຄງປະກອບກົງຈັກການຈັດຕັ້ງ ຂອງ ອວຕຊ ໂດຍໄດ້ມີຜົນງານປະກອບສ່ວນສ້າງນະໂຍບາຍແຫ່ງຊາດ ດ້ານວິທະຍາສາດ ແລະ ເຕັກໂນໂລຊີ ເຖິງປີ 2010 ມາເປັນທິດທາງ ໃຫ້ແກ່ການເຄື່ອນໄຫວວຽກງານວິທະຍາສາດ ແລະ ເຕັກໂນໂລຊີ. ຫຼັ້ງຈາກນັ້ນ, ການເຄື່ອນໄຫວວຽກງານດັ່ງກ່າວ ມາໄດ້ພຽງ 4 ປີ ກໍ່ໄດ້ມີການປັບປຸງກົງຈັກການຈັດຕັ້ງຄືນໃຫມ່ອີກຄັ້ງ. ໂດຍໄດ້ຍົກລະດັບ ຈາກອົງການໃນເມື່ອກ່ອນ ສ້າງຕັ້ງມາເປັນ ກະຊວງວທະຍາສາດ ແລະ ເຕັກໂນໂລຊີ ຕາມດຳລັດ ນາຍົກລັດຖະມົນຕີ ເລກທີ 309/ນຍ, ລົງວັນທີ 28 ກັນຍາ 2011ຈາກນັ້ນມາ ກົມວິທະຍາສາດ ແລະ ເຕັກໂນໂລຊີ ຈຶ່ງໄດ້ແຍກການເຄື່ອນໄຫວວຽກວີຊາການ ອອກເປັນ 2 ກົມວິຊາການໃຫມ່ ແລະ ປ່ຽນຊື່ມາເປັນ "ກົມວິທະຍາສາດ" ໃນປັດຈຸບັນ, ໂດຍມີລາຍລະອຽດຂອງໂຄງປະກອບການຈັດຕັ້ງ ບໍລິຫານງານຂອງກົມ ວິທະຍາສາດ  ໂດຍຫຍໍ້ດັ່ງລຸ່ມນີ້:

ໂຄງປະກອບການຈັດຕັ້ງ

                   ຄະນະບໍລິຫານ

ທ່ານ ປອ. ສີພອນ ແສງສຸລິຈັນ  ຮອງຫົວໜ້າ ກົມວິທະຍາສາດ

ທ່ານ ປອ. ນາງ ແກ້ວວີວອນ ອຸດທະຈັກ ຮອງຫົວໜ້າ ກົມວິທະຍາສາດ

             ໂຄງປະກອບການຈັດຕັ້ງ

                          ກົມວິທະຍາສາດປະກອບດ້ວຍ 5 ພະແນກຄື:
                           1. ພະແນກ ສັງລວມ
                           2. ພະແນກ ນະໂຍບາຍ ແລະ ຍຸດທະສາດ
                           3. ພະແນກ ຄຸ້ມຄອງວິທະຍາສາດ
                           4. ພະແນກສົ່ງເສີມ ແລະ ພັດທະນາວິທະຍາສາດ 
                           5. ພະແນກສະຖິຕິຂໍ້ມູນວິທະຍາສາດ

                           6. ພະແນກ ວິທະຍາສາດນິວເຄຼຍ

                  ໂຄງຮ່າງການຈັດຕັ້ງ
               

ທີ່ຕັ້ງແລະພາລະບົດບາດ

                   ກົມວິທະຍາສາດຂຽນດ້ວຍຕົວອັກສອນຫຍໍ້ວ່າ: “ກວ”, ສັງກັດໃນໂຄງປະກອບກົງຈັກຂອງ ກະຊວງວິທະຍາສາດ ແລະ ເຕັກໂນໂລຊີ, ມີພາລະບົດບາດເປັນ ເສນາທິການໃຫ້ແກ່ກະຊວງ ໃນການພັດທະນາ ແລະ ຄຸ້ມຄອງມະຫາພາກ ກ່ຽວກັບວຽກງານນະໂຍບາຍ, ແຜນຍຸດທະສາດ, ການຄຸ້ມຄອງ-ສົ່ງເສີມພັດທະນາ ແລະ ສັງລວມສະຖິຕິຂໍ້ມູນດ້ານວິທະຍາສາດ ແລະ ວຽກງານຄວາມປອດໄພລັງສີ ແລະ ວິທະຍາສາດນີວເຄຼຍ ໃນ ສປປ ລາວ.

ໜ້າທີ່

1. ຄົ້ນຄ້ວາຜັນຂະຫຍາຍແນວທາງນະໂຍບາຍຂອງພັກ, ລັດຖະບານ;ແຜນການ, ແຜນງານ, ໂຄງການ ລະອຽດຂອງກະຊວງ ໃຫ້ກາຍເປັນແຜນວຽກລະອຽດ, ໂຄງ ການສະເພາະດ້ານວຽກງານວິທະຍາ ສາດ ແລະ ວຽກງານຄຸ້ມຄອງຄວາມປອດໄພລັງສີ ແລະ ນີວເຄຼຍຂອງກົມ ແລະ ຮັບຜິດຊອບໃນການຈັດຕັ້ງປະຕິບັດ;

2. ສຶກສາຄົ້ນຄ້ວາ, ຮ່າງ ແລະ ນຳສະເໜີຂັ້ນເທີງອອກນະໂຍບາຍ, ວິໄສທັດ-ແຜນຍຸດທະສາດແລະນິຕິກຳຕ່າງໆໃນການຄຸ້ມຄອງ, ການຄົ້ນຄ້ວາແລະການພັດທະ ນາດ້ານວິທະຍາສາດພ້ອມທັງຕິດຕາມກວດກາ, ຕີລາຄາແລະ ລາຍງານສະພາບການຈັດຕັ້ງປະຕິບັດ;

3. ຈັດຕັ້ງ ແລະ ເຂົ້າຮ່ວມສ້າງບັນດານິຕິກໍາ, ຂໍ້ກໍານົດ ບົດແນະນໍາ ກ່ຽວກັບການຄຸ້ມຄອງຄວາມປອດໄພທາງກໍາມັນຕະພາບລັງສີ ແລະ ນີວເຄຼຍ;

4. ສຶກສາຄົ້ນຄວ້າ, ວິໄຈບັນດານະໂຍບາຍ, ນິຕິກໍາ ແລະ ບຽບການຕ່າງໆ ຂອງອົງການພະລັງານປະລະມະນູສາກົນ ແລະ ພາກພື້ນອາຊີ-ປາຊິກຟິກ ກ່ຽວກັບການ ຄຸ້ມຄອງຄວາມປອດໄພລັງສີ-ນີວເຄຼຍ ພ້ອມທັງ ຕິດຕາມກວດກາ, ຕີລາຄາ ແລະ ລາຍງານສະພາບການຈັດຕັ້ງປະຕິບັດ ຕໍ່ຄະນະນໍາກະຊວງ;

5. ສ້າງ ແລະ ນໍາສະເໜີການນໍາກະຊວງ ກ່ຽວກັບບັນດານະໂຍບາຍ, ທິດທາງພັດທະນາທີ່ເປັນບູລິມະສິດ, ແຜນງານ, ແຜນການ ແລະ ໂຄງການຮ່ວມມືວິຊາການ ໃນຂົງເຂດວຽກງານຄຸ້ມຄອງຄວາມປອດໄພລັງສີ ແລະນີວເຄຼຍ; ພ້ອມທັງຈັດຕັ້ງ ຜັນຂະຫຍາຍບັນດາແຜນງານ, ແຜນການທີ່ໄດ້ຮັບອະນຸມັດ;

6. ເປັນໃຈກາງປະສານສົມທົບກັບບັນດາຂະແໜງການແລະທ້ອງຖິ່ນເພື່ອຄຸ້ມຄອງ ແລະຕິດຕາມກວດກາ ທຸກການເຄື່ອນໄຫວວຽກງານວິທະຍາສາດ ພ້ອມທັງລາຍ ງານສະພາບການ ທາງດ້ານວິທະຍາສາດ ໃນຂອບເຂດທົ່ວປະເທດໃຫ້ການ ນຳກະຊວງຢ່າງເປັນປົກກະຕິ;

7. ເກັບກຳ, ບັນທຶກ, ຢັ້ງຢືນຜົນງານແລະ ຫົວຄິດປະດິດສ້າງ ຂອງນັກວິທະຍາສາດ, ນັກຄົ້ນຄ້ວາ-ວິໄຈດ້ານວິທະຍາສາດ ແລະ ນຳສະເໜີ ກະຊວງປະກາດກຽດ ຕິຄຸນ ແລະ ໃຫ້ບຳເນັດ ລາງວັນຕາມຄວາມເໝາະສົມ;

8. ຄຸ້ມຄອງ, ສົ່ງເສີມ ແລະ ພັດທະນາວິທະຍາສາດ ພ້ອມທັງ ເລືອກເຟັ້ນ ແລະ ເຜີຍແຜ່ຜົນສໍາເລັດດ້ານວິທະຍາສາດທີ່ກ້າວໜ້າ ແລະ ທັນສະໄໝໃຫ້ທົ່ວສັງຄົມ;

9. ສ້າງ ແລະ ຍົກລະດັບວິຊາການດ້ານວິທະຍາສາດ ໃຫ້ບັນດາຂະແໜງການຢູ່ສູນກາງ ແລະ ທ້ອງຖິ່ນລວມທັງໂຄສະນາເຜີຍແຜ່, ຊຸກຍູ້ ສົ່ງເສີມສ້າງຈິດສໍານຶກ, ແລະ ສ້າງຄວາມສົນໃຈໃຫ້ແກ່ສັງຄົມ ເຫັນຄວາມສໍາຄັນດ້ານວິທະຍາສາດ ຕໍ່ກັບການພັດທະນາປະເທດ;

10. ເປັນໃຈກາງປະສານສົມທົບກັບບັນດາກະຊວງ, ຂະແໜງການຄຸ້ມຄອງລັດທີ່ກ່ຽວຂ້ອງ ດ້ານຄວາມປອດໄພ ແລະ ການຄວບຄຸມກໍາມັນຕະພາບລັງສີ ແລະ ນີວເຄຼຍ ພ້ອມທັງລາຍງານສະພາບການ ເຄື່ອນໄຫວວຽກງານດັ່ງກ່າວ ໃນຂອບເຂດທົ່ວປະເທດໃຫ້ການນໍາກະຊວງ ຢ່າງເປັນປົກກະຕິ;

11. ໃຫ້ຄຳແນະນຳທາງດ້ານວິຊາການ ແກ່ການຈັດຕັ້ງ ແລະ ບຸກຄົນ ໃນສັງຄົມ ໃນການຈັດຕັ້ງປະຕິບັດນະໂຍບາຍ, ແຜນຍຸດທະສາດ, ກົດໝາຍ ແລະ ລະບຽບ ການ, ແຜນການ, ແຜນງານ ແລະ ໂຄງ ການໃນຂະແໜງການ ຂອງຕົນ;

12. ປະສານສົມທົບກັບພາກສ່ວນທີ່ກ່ຽວຂ້ອງ ທັງສູນກາງ ແລະ ທ້ອງຖິ່ນໃນການຄຸ້ມຄອງ, ການກຳນົດຫົົວຂໍ້ ຂອງການຄົ້ນຄວ້າ ແລະ ພັດທະນາວິທະຍາສາດ;

13. ເປັນຈຸດປະສານງານ ແລະ ກອງເລຂາ ໃຫ້ຄະນະກໍາມະການກ່ຽວກັບພະລັງງານປະລະມະນູ ເພື່ອການຮ່ວມມືກັບອົງການພະລັງງານປະລະມະນູສາກົນ (IAEA);

14. ຮັບ, ສຶກສາ, ພິຈາລະນາແລະນຳສະເໜີກະຊວງແກ້ໄຂຄຳສະເໜີ, ຄໍາຮ້ອງທຸກ,ຈົດທະບຽນ, ອອກຫລື ຖອນໜັງສືອະນຸຍາດໃນການເຄື່ອນໄຫວວຽກງານວິທະ ຍາສາດ ຂອງບຸກຄົນຫລືການ ຈັດຕັ້ງທີ່ກ່ຽວຂ້ອງກັບວິທະຍາສາດ ແລະ ບັນດາກິດຈະການທີ່ນໍາໃຊ້ກໍາມັນຕະພາບລັງສີ ແລະ ວິທະຍາສາດນີວເຄຼຍ;

15. ສຶກສາຄົ້ນຄ້ວາການເຂົ້າເປັນພາຄີແລະຈັດຕັ້ງປະຕິບັດພັນທະສາກົນດ້ານວິທະຍາສາດທີ່ສປປລາວໄດ້ເຂົ້າຮ່ວມເປັນພາຄີ;

16. ເກັບກຳ, ວິໄຈຂໍ້ມູນດ້ານຕ່າງໆ ແລະ ສ້າງລະບົບຂໍ້ມູນສະຖິຕິດ້ານວິທະຍາສາດ ຂອງ ສປປ ລາວ ເພື່ອແລກປ່ຽນທັງພາຍໃນ ແລະ ຕ່າງປະເທດ; ພ້ອມທັງ ຮັບໃຊ້ແກ່ການກຳນົດທິດທາງ ແລະ ວາງແຜນພັດທະນາປະເທດ;

17. ສະເໜີປັບປຸງໂຄງປະກອບການຈັດຕັ້ງຂອງກົມ ໃຫ້ສອດຄ່ອງກັບການຂະຫຍາຍຕົວຂອງວຽກງານໃນແຕ່ລະໄລຍະ;

18. ພົວພັນຮ່ວມມື, ພົບປະ, ເຈລະຈາ ແລະ ປະສານງານກັບອົງການຈັດຕັ້ງສາກົນ ດ້ານວິທະຍາສາດ ທັງຢູ່ພາຍໃນ ແລະ ຕ່າງປະເທດເພື່ອຍາດເເຍ່ງການຊ່ວຍ ເຫລືອ ແລະ ສະໜັບສະໜູນກ່ຽວກັບວຽກງານວິທະຍາສາດ;

19. ປະຕິບັດໜ້າທີ່ອື່ນໆ ຕາມການມອບໝາຍ ຂອງກະຊວງ.

ຂອບເຂດສິດ

1. ຈັດຕັ້ງຜັນຂະຫຍາຍການປະຕິບັດແນວທາງ, ແຜນນະໂຍບາຍຂອງພັກ ແລະ ລັດຖະບານ; ແຜນ ການ, ແຜນງານ ຂອງກະຊວງໃຫ້ກາຍເປັນ ແຜນວຽກລະອຽດ ແລະ ໂຄງການສະເພາະຂອງກົມ;

2. ອອກລະບຽບການ, ບົດແນະນຳ, ໃບແຈ້ງການ, ໃບຢັ້ງຢືນ ແລະ ຮຽກໂຮມປະຊຸມກ່ຽວກັບວຽກງານວິທະຍາສາດ ແລະ ບົດວິພາກຮັບປະກັນຄວາມປອດໄພ ຂອງການນໍາໃຊ້ກໍາມັນຕະພາບລັງສີ ແລະ ວິທະຍາສາດນີວເຄຼຍ ຕາມການມອບໝາຍ ຂອງກະຊວງ;

3. ກວດກາ, ຕີລາຄາແລະນຳສະເໜີກະຊວງກ່າວເຕືອນ, ໂຈະຫລືຍົກເລີກບັນດາກິດຈະການທີ່ສົ່ງຜົນສະທ້ອນອັນບໍ່ດີຕໍ່ສັງຄົມ ທີ່ຕິດພັນກັບວິທະຍາສາດ ແລະ ການນໍາໃຊ້ຄວາມກ້າວໜ້າທາງວິທະຍາສາດນີວເຄຼຍ;

4. ສະເໜີສ້າງຕັ້ງຫລືປັບປຸງ, ຍົກເລີກກົງຈັກການຈັດຕັ້ງ,ແຕ່ງຕັ້ງ, ຍົກຍ້າຍ, ປົດຕຳແໜ່ງ, ເລື່ອນຊັ້ນ ເລື່ອນຂັ້ນ, ວ່າຈ້າງຊ່ຽວຊານຫລືແຮງງານ ຊົ່ວຄາວ; ປະຕິບັດ ວິໄນ ແລະ ປະຕິບັດນະໂຍບາຍ ອື່ນໆ ຕໍ່ພະນັກງານ ຂອງຕົນ ບົນພື້ນຖານລະບຽບຫລັກການ ຂອງການແບ່ງຂັ້ນຄຸ້ມຄອງ;

5. ນຳສະເໜີໃຫ້ບຳເນັດ ລາງວັນແກ່ການຈັດຕັ້ງທີ່ດີເດັ່ນດ້ານວິທະຍາສາດ, ບຸກຄົນທີ່ມີຫົວຄິດປະດິດສ້າງ, ນັກວິທະຍາສາດ, ນັກຄົ້ນຄ້ວາດີເດັ່ນດ້ານວິທະຍາສາດ;

6. ຄຸ້ມຄອງນຳໃຊ້ພາຫະນະວັດຖຸ, ອຸປະກອນທີ່ເປັນຊັບສົມບັດລວມພາຍໃນກົມຕາມນະໂຍບາຍ, ລະບຽບການ ແລະ ຄວາມເໝາະສົມ;

7. ຄຸ້ມຄອງ ແລະ ນຳໃຊ້ງົບປະມານຕາມແຜນການທີ່ໄດ້ຮັບອະນຸມັດ ຈາກກະຊວງ;

8. ເຂົ້າຮ່ວມ ແລະ ປະກອບຄວາມຄິດຄວາມເຫັນໃນກອງປະຊຸມຂອງຂະແໜງການ ພາຍໃນ ແລະ ຕ່າງປະເທດ ທີ່ພົວພັນເຖິງວຽກງານວິທະຍາສາດ ແລະ ວຽກ ງານການນໍາໃຊ້ກໍາມັນຕະພາບລັງສີ ແລະ ວິທະຍາສາດນີວເຄຼຍ ຕາມການມອບໝາຍ ຂອງກະຊວງ;

9. ຮຽກໂຮມແລະຈັດກອງປະຊຸມ, ຈັດສຳມະນາຝຶກອົບຮົມອົບຮົມ ແລະ ໂຄສະນາເຜີຍແຜ່ ບັນດາລະບຽບກົດໝາຍ, ຄວາມຮູ້ພື້ນຖານທີ່ກ່ຽວຂ້ອງ ກັບວິທະຍາ ສາດ ແລະ ການນໍາໃຊ້ກໍາມັນຕະພາບລັງສີ ແລະ ວິທະຍາສາດນີວເຄຼຍ ຂອງຂະແໜງການກ່ຽວຂ້ອງ ໃນຂັ້ນຕ່າງໆ ຕາມການມອບໝາຍຂອງກະຊວງ;

10. ສ້າງລະບົບສະຖິຕິ, ເກັບຮັກສາຖານຂໍ້ມູນ, ຂ່າວສານ ກ່ຽວກັບກໍາມັນຕະພາບລັງສີ ແລະວິທະຍາ ສາດນີວເຄຼຍ; ໃຫ້ບໍລິການວິທະຍາສາດ, ສະໜອງຂໍ້ມູນຂ່າວ ສານ ແລະ ການສ້າງຈິດສໍານຶກໃຫ້ແກ່ສັງຄົມ ໃນການປ້ອງກັນຄວາມປອດໄພລັງສີ ແລະ ນີວເຄຼຍ ຕາມການມອບໝາຍ ຂອງກະຊວງ;

11. ພົວພັນຮ່ວມມື, ພົບປະ, ເຈລະຈາ, ເຊັນບົດບັນທຶກ, ອະນຸສັນຍາ ແລະ ສັນຍາກັບຕ່າງປະເທດ ແລະ ອົງການຈັດຕັ້ງສາກົນຕ່າງໆດ້ານວິທະຍາສາດ ຕາມການ ມອບໝາຍຂອງກະຊວງ;

12. ປະຕິບັດຂອບເຂດສິດອື່ນໆ ຕາມການມອບໝາຍ ຂອງກະຊວງ.

ແບບແຜນວິທີເຮັດວຽກ

1. ເຮັດວຽກມີແຜນການ, ແຜນງານແລະໂຄງການລະອຽດ, ແກ້ໄຂວຽກງານຢ່າງມີຈຸດສຸມແລະມີ ເປົ້າໝາຍໃນແຕ່ລະໄລຍະ;

2. ປະຕິບັດລະບອບປະຊຸມ ແລະ ສ່ອງແສງປະຈຳອາທິດ, ປະຈຳເດືອນ, 3 ເດືອນ, 6 ເດືອນຫລືປະຈຳປີເພື່ອລາຍງານໃຫ້ ຄະນະກົມ ກໍຄືຄະນະນໍາກະຊວງ ຢ່າງ ເປັນປົກກະຕິ;

3. ປະສານສົມທົບຢ່າງແໜ້ນແຟ້ນ ກັບບັນດາກົມ, ສະຖາບັນ ອອ້ມຂ້າງພາຍໃນກະຊວງ ແລະ ພະແນກການຢູ່ຂັ້ນແຂວງ ເພື່ອຮັບປະກັນໃຫ້ແກ່ການເຄື່ອນໄຫວ ວຽກງານວິທະຍາສາດ ໃຫ້ໄດ້ຮັບຜົນດີ;

4. ເຮັດວຽກງານມີການຊຸກຍູ້, ຕິດຕາມກວດກາ, ສະຫລຸບຖອດຖອນບົດຮຽນ, ຕີລາຄາຜົນໄດ້ຜົນເສຍພ້ອມທັງປະຕິບັດລະບອບລາຍງານຂໍຄໍາເຫັນ ຄະນະນໍາ ກະຊວງ;

5.ໃນການເຄື່ອນໄຫວວຽກງານ ຕ້ອງຖືເອົາການຫັນລົງຮາກຖານ ຕິດພັນກັບວຽກງ່ນຕົວຈິງ ເພື່ອປັບປຸງວຽກງານຂອງກົມ ໃຫ້ເຂັ້ມແຂງ ແລະ ປອດໃສ.

        ວຽກງານບໍລິຫານ

        ຕິດຕໍ່ສອບຖາມ

 ໂຄງກາານ ຕ່າງໆຂອງ ກົມວິທະຍາສາດ