ພິທີເປີດຂະບວນການແຂ່ງຂັນກິລາຊີງຂັນອົງຄະນະພັກ ກະຊວງວິທະຍາສາດ ແລະ ເຕັກໂນໂລຊີ

240ເພື່ອເປັນການສ້າງຂະບວນການຕ້ອນຮັບກອງປະຊຸມໃຫຍ່ ຄັ້ງທີ່ II ຂອງອົງຄະນະພັກ ກະຊວງວິທະຍາສາດ

ແລະ ເຕັກໂນໂລຊີ, ກອງປະຊຸມໃຫຍ່ຄັ້ງທີ II ຂອງບັນດາໜ່ວຍພັກຫ້ອງການ, ກົມ, ສະຖາບັນ ແລະ ກອງປະຊຸມ ໃຫຍ່ ຄັ້ງທີ II ຂອງ 3 ອົງການຈັດຕັ້ງມະຫາຊົນ (ຊາວໜຸ່ມ, ແມ່ຍິງ ແລະ ກຳມະບານ) ຂອງກະຊວງວິທະຍາ ສາດ ແລະ ເຕັກໂນໂລຊີ ທີ່ຈະໄຂຂຶ້ນໃນມໍ່ໆນີ້, ທັງເປັນການສ້າງຂະບວນແຂ່ງຂັນຮັກຊາດພັດທະນາສະເຫຼີມສະ ລອງວັນສຳຄັນໆຂອງຊາດ ໃຫ້ມີບັນຍາກາດເບີກບານມ່ວນຊື່ນ ແລະ ຮັດແໜ້ນຄວາມສາມັກຄີ ລະຫວ່າງພະນັກ ງານທົ່ວກະຊວງໃຫ້ແໜ້ນແຟ້ນຢ່າງກວ້າງຂວາງ ເສີມສ້າງຮ່າງກາຍມີໃຫ້ຄວາມແຂງແຮງສົມບູນດີ ເພື່ອສືບຕໍ່ຈັດ ຕັ້ງປະຕິບັດໜ້າທີການເມືອງ ທີ່ຂັ້ນເທິງມອບໝາຍໃຫ້ ແລະ ໃຫ້ໄດ້ຮັບປະສິດທິຜົນສູງ.

ໃນຕອນແລງຂອງວັນທີ 5 ກໍລະກົດ 2019 ທີ່ຜ່ານມາ, ກະຊວງວິທະຍາສາດ ແລະ ເຕັກໂນໂລຊີ ໄດ້ ຈັດພິທີເປີດຂະບວນການແຂ່ງຂັນກິລາ ທົ່ວກະຊວງ ຢູ່ເດີ່ນເຕະບານ ເຟີລາລີ ນະຄອນຫຼວງວຽງຈັນ, ໂດຍໃຫ້ກຽດ ເຂົ້າຮ່ວມ ແລະ ກ່າວເປີດພິທີຂອງ ທ່ານ ບັນດິດ ສຈ. ບໍ່ວຽງຄຳ ວົງດາລາ, ກຳມະການສູນກາງພັກ, ເລຂາຄະນະ ພັກ, ລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ, ມີບັນດາຄະນະພັກ-ຄະນະນຳ, ບັນດາຫົວໜ້າ ຫ້ອງການ, ກົມ, ສະຖາບັນ ແລະ ຫົວໜ້າພະແນກວິທະ ຍາສາດ ແລະ ເຕັກໂນໂລຊີ ນະຄອນຫຼວງວຽງຈັນ ພ້ອມດ້ວຍພະນັກງານ-ລັດຖະກອນເຂົ້າຮ່ວມຢ່າງພ້ອມພຽງ.

ໃນໂອກາດຈັດການແຂ່ງຂັນກິລາປີນີ້ ແມ່ນຈະໄດ້ແຂ່ງຂັນກິລາ 2 ປະເພດຄື: ກິລາບານເຕະຊາຍ ແລະ ເປຕັງ ປະສົມຍິງ-ຊາຍ ເພື່ອຊີງຂັນອົງຄະນະພັກກະ ຊວງວິທະຍາສາດ ແລະ ເຕັກໂນໂລຊີ ຊຶ່ງມີລາຍລະອຽດ ຄື: ປະເພດກິລາບານເຕະ ປະກອບມີທັງໝົດ 10 ທີມ ແບ່ງອອກເປັນ 2 ສາຍ (ກ, ຂ) ສາຍ ກ ປະກອບມີ: ກົມ ເຕັກໂນໂລຊີ ດິຈິຕ໋ອນ, ຫ້ອງການສະພາວິທະຍາສາດ ແຫ່ງຊາດ, ກົມແຜນການ ແລະ ຮ່ວມມື, ສະຖາບັນນິເວດວິທະຍາ ແລະ ເຕັກໂນໂລຊີ ຊີວະພາບ ແລະ ທີມປະສົມ 3 ພາກສ່ວນ (ກົມວິທະຍາສາດ+ສະຖາບັນການຄຸ້ມຄອງ ວິທະຍາສາດ ແລະ ເຕັກໂນໂລຊີ+ ກົມເຕັກໂນໂລຊີ ແລະ ນະວັດຕະກຳ) ແລະ ສາຍ ຂ ປະກອບມີ: ກົມມາດ ຕະຖານ ແລະ ວັດແທກ, ສະຖາບັນພະລັງງານທົດແທນ ແລະ ວັດສະດຸໃໝ່, ຫ້ອງການ ກະຊວງ, ທີມປະສົມ ກົມກວດກາ+ກົມຈັດຕັ້ງ ແລະ ພະນັກງານ, ທີມປະສົມ ສະຖາບັນເຕັກໂນໂລຊີ ຄອມພິວເຕີ ແລະ ເອເລັກໂຕຣນິກ+ກົມຊັບສິນທາງປັນຍາ ຊຶ່ງລວມທັງໝົດ ມີ 24 ນັດ. ສ່ວນປະເພດກິລາ ເປຕັງປະສົມ (ຍິງ-ຊາຍ) ປະກອບມີ 14 ພາກສ່ວນເຂົ້າຮ່ວມ ປະກອບມີ 14 ທີມ ແບ່ງອອກເປັນ 2 ສາຍ (ກ ແລະ ຂ) ລວມມີການແຂ່ງຂັນທັງໝົດ 14 ນັດ, ໂດຍເລີ່ມຈັດການແຂ່ງຂັນແຕ່ເດືອນ ກໍລະກົດ ຫາ ເດືອນ ກັນຍາ 2019.

ໃນໂອກາດຈັດພິທີເປີດການແຂ່ງຂັນກິລາໃນຄັ້ງນີ້ ຍັງໄດ້ມີການແຂ່ງຂັນເຕະບານມິດຕະພາບ ລະຫວ່າງ ທີມສະຫະພັນແມ່ຍິງກະຊວງພົບກັບ ທີມຄະນະນຳ ກະຊວງ, ຜົນການແຂ່ງຂັນແມ່ນສະເໝີກັນ 3-3 ປະຕູ ແລະ ທີມຊາວໜຸ່ມ ກະຊວງ ພົບກັບ ທີມຊາວໜຸ່ມ ພະແນກ ວິທະຍາສາດ ແລະ ເຕັກໂນໂລຊີ ນະຄອນຫຼວງວຽງ ຈັນ ຊຶ່ງຜົນການແຂ່ງຂັນແມ່ນ ພະແນກ ວິທະຍາສາດ ແລະ ເຕັກໂນໂລຊີ ນະຄອນຫຼວງວຽງຈັນ ສາມາດເອົາຊະນະທີມຊາວໜຸ່ມກະຊວງວິທະຍາສາດ ແລະ ເຕັກໂນໂລຊີ ໂດຍຄະແນນ 4-2 ປະຕູ.

ບົດຂ່າວ: ບຸນທັນ ນັນທະວົງ
ພາບ ແລະ ຂ່າວ: ພະແນກຂ່າວສານ ແລະ ປະຊາສໍາພັນ

241243250249248246245
247
244