ພວຕ ແຂວງ ສະຫວັນນະເຂດ ສ້າງຄວາມເຂັ້ມແຂງ ວຽກງານເຜີຍແຜ່ຂໍ້ມູນຂ່າວສານ

There are no translations available.

069ໃນຕອນເຊົ້າຂອງວັນທີ 29 ກໍລະກົດ 2020 ຜ່ານມານີ້, ພະແນກວິທະຍາສາດ ແລະ ເຕັກໂນໂລຊີ (ພວຕ)

ແຂວງ ສະຫວັນນະເຂດ ໄດ້ຈັດຝຶກອົບຮົມໃນຫົວຂໍ້ “ສ້າງຄວາມເຂັ້ມແຂງທາງດ້ານວຽກງານຂ່າວສານ ແລະ ປະ ຊາສໍາພັນ” ໃຫ້ແກ່ພະນັກງານພາຍໃນພະແນກ ໂດຍການ ເປັນປະທານກ່າວເປີດຂອງ ທ່ານ ບຸນເຄືອບ ແກ້ວມະນີ, ຮອງຫົວໜ້າ ພວຕ ແຂວງ ສະຫວັນນະເຂດ, ຊຶ່ງມີ ທ່ານ ບິນລີ້ ສີສຸລາດ, ຮອງຫົວໜ້າພະແນກຂ່າວສານ ແລະ ປະຊາສໍາພັນ, ຫ້ອງການ ກະຊວງວິທະຍາສາດ ແລະ ເຕັກໂນໂລຊີ ເຂົ້າຮ່ວມເປັນນັກວິທະຍາກອນ, ມີບັນດານັກ ສໍາມະນາກອນຈາກຂະແໜງການພາຍໃນພະແນກເຂົ້າ ຮ່ວມທັງໝົດ 15 ທ່ານ.

ຈຸດປະສົງຂອງການຝຶກອົບຮົມຄັ້ງນີ້ ກໍເພື່ອເປັນການສ້າງຄວາມເຂັ້ມແຂງໃຫ້ແກ່ວິຊາການຢູ່ຂະແໜງ ການພາຍໃນພະແນກໄດ້ຮຽນຮູ້ກ່ຽວກັບ ພາລະບົດບາດ ແລະ ໜ້າທີ່ຂອງວຽກງານຂ່າວສານ ແລະ ປະຊາສໍາພັນ ໃນຂົງເຂດວິທະຍາສາດ ແລະ ເຕັກໂນໂລຊີ ເພື່ອໂຄສະນາເຜີຍແຜ່ຜົນງານການຄົ້ນຄວ້າ, ວິໄຈ, ຜົນການເຄື່ອນ ໄຫວຈັດຕັ້ງປະຕິບັດວຽກງານຕ່າງໆໃນຂະແໜງການຂອງຕົນ ກໍຄືໃນທົ່ວແຂວງ ແນໃສ່ສ້າງຄວາມເຂັ້ມແຂງທາງ ດ້ານວຽກງານເຜີຍແຜ່ຂໍ້ມູນຂ່າວສານຂອງພະແນກອອກສູ່ສັງຄົມຢ່າງກວ້າງຂວາງ.

ພ້ອມນັ້ນ, ບັນດານັກສໍາມະນາກອນທີ່ເຂົ້າຮ່ວມຍັງໄດ້ຮຽນຮູ້ທັກສະພື້ນຖານຂອງການຂຽນຂ່າວສັ້ນ, ການວິເຄາະຂໍ້ມູນຂ່າວ, ກວດແກ້ບົດຂ່າວ, ການຮັບມື ແລະ ໂຕ້ຕອບຂ່າວບິດເບືອນຄວາມຈິງທີ່ຂະແໜງການຕົນຮັບຜິດຊອບ ຊຶ່ງນັກສໍາມະນາກອນແມ່ນ ໄດ້ຮຽນຮູ້ທັງພາກທິດສະດີ ແລະ ປະຕິບັດຕົວຈິງ.

ທ່ານ ບຸນເຄືອບ ແກ້ວມະນີ, ຮອງຫົວໜ້າ ພວຕ ແຂວງ ສະຫວັນນະເຂດ ໄດ້ກ່າວວ່າ: ວຽກງານເຜີຍແຜ່ຂໍ້ມູນຂ່າວສານ ເປັນວຽກງານໜຶ່ງທີ່ສໍາຄັນ ແລະ ເປັນ ກະບອກສຽງໃຫ້ແກ່ພະແນກໃນການໂຄສະນາເຜີຍແຜ່ຜົນງານການເຄື່ອນໄຫວຕ່າງໆ ເພື່ອເຮັດໃຫ້ສັງຄົມໄດ້ຮັບຮູ້ ແລະ ເຂົ້າໃຈຕໍ່ວຽກງານວິທະຍາສາດ ແລະ ເຕັກໂນໂລ ຊີ ເວົ້າລວມ, ເວົ້າສະເພາະ ແມ່ນການຈັດຕັ້ງປະຕິບັດວຽກງານຂອງພະແນກວິທະຍາສາດ ແລະ ເຕັກໂນໂລຊີ ແຂວງ ສະຫວັນນະເຂດ. ພ້ອມນັ້ນ, ທ່ານຍັງໄດ້ຮຽກຮ້ອງ ໃຫ້ນັກສໍາມະນາກອນເອົາໃຈໃສ່ໃນການເກັບກ່ຽວບົດຮຽນຈາກນັກວິທະຍາກອນ ເພື່ອເຮັດໃຫ້ວຽກງານເຜີຍແຜ່ຂໍ້ມູນຂ່າວສານຂອງພະແນກມີຄວາມເຂັ້ມແຂງຂຶ້ນເທື່ອ ລະກ້າວ.

ຜ່ານການຝຶກອົບຮົມເປັນເວລາເຄິ່ງວັນ ເຫັນໄດ້ວ່ານັກສໍາມະນາກອນແມ່ນມີຄວາມເອົາໃຈໃສ່ສູງ ແລະ ຍາດໄດ້ບົດຮຽນຈາກນັກວິທະຍາກອນ ພ້ອມນັ້ນ, ຍັງໄດ້ ມີການສົນທະນາແລກປ່ຽນບົດຮຽນລະຫວ່າງນັກສໍາມະນາກອນດ້ວຍກັນ ແລະ ນັກວິທະຍາກອນ ຊຶ່ງເຕັມໄປດ້ວຍບັນຍາກາດຟົດຟື້ນ ແລະ ປະສົບຜົນສໍາເລັດຢ່າງຈົບ ງາມ.

ພາບ ແລະ ຂ່າວ: ທັດສະນີ ພົງບັນດິດ

070071072074075