ງານພົບປະບັນດາອະດີດນັກສຶກສາຂອງປະເທດພາກ ພື້ນທີ່ຈົບຈາກຣັດເຊຍ

059ໃນວັນທີ 4 ຕຸລາ 2019 ຜ່ານມາ, ທີ່ຫໍວັດທະນະທຳ, ນະຄອນຫລວງວຽງຈັນ ໄດ້ມີກອງປະຊຸມພົບປະບັນດາ

ອະດີດນັກສຶກສາຂອງປະເທດພາກພື້ນ ທີ່ຈົບຈາກອາດີດສະຫະພາບໂຊຫວຽດ ແລະ ສະຫະພັນຣັດເຊຍ ໂດຍມີ ທ່ານ ບັນດິດ ສຈ. ບໍ່ວຽງຄຳ ວົງດາລາ, ລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ ທັງເປັນປະທານ ສະມາຄົມມິດຕະພາບ ລາວ-ຣັດເຊຍ, ທ່ານ ເວຍດີເມຍ ກາລີນິນ, ເອກອັກຄະລັດຖະທູດວິສາມັນ ຜູ້ມີອຳນາດ ເຕັມແຫ່ງ ສະຫະພັນຣັດເຊຍປະຈຳລາວ, ທ່ານ ອີກໍຣ໌ ປານຟີລົບ, ຮອງປະທານສະມາຄົມມິດຕະພາບ ຣັດ ເຊຍ-ລາວ, ທ່ານ ວາດີມີຣ໌ ເຈຕີ ປະທານສະມາຄົມອະດີດນັກສືກສາທົ່ວໂລກ, ພ້ອມດ້ວຍບັນດາອະດີດນັກ ສຶກສາ ຈາກປະເທດພູມີພາກ 8 ຄື: ເລບານອນ, ຣັດເຊຍ, ກຳປູເຈຍ, ໂປແລນ, ເບລາລຸດ, ສີລັງກາ, ຫວຽດນາມ, ເນປານ ແລະ ລາວ ເຂົ້າຮ່ວມ.

ທ່ານ ບັນດິດ ສຈ. ບໍ່ວຽງຄຳ ວົງດາລາ ໄດ້ມີຄຳເຫັນວ່າ: ສາຍພົວພັນລະຫວ່າງ ສປປ ລາວ ແລະ ສະຫະພັນລັດເຊຍ ແມ່ນຕັ້ງຢູ່ບົນພື້ນຖານຂອງຄວາມເຂົ້າໃຈ, ການເຄົາລົບນັບຖື ແລະ ໄວ້ເນື້ອເຊື່ອໃຈເຊິ່ງກັນ ແລະ ກັນ ເຊິ່ງໄດ້ກຳເນີດເກີດຂຶ້ນມາແຕ່ສະໄໝສະຫະພາບໂຊວຽດ ແລະ ຊ່ວງເວລາແຫ່ງການສ້າງຕັ້ງ ສປປ ລາວ. ລາວ ແລະ ຣັດເຊຍໄດ້ສ້າງຕັ້ງສາຍພົວພັນທາງ ການທູດໃນວັນທີ 7 ຕຸລາ 1960 ແລະ ໃນປີຕໍ່ໄປພວກເຮົາຈະສະເຫຼີມສະຫຼອງວັນຄົບຮອບ 60 ປີ ແຫ່ງການສ້າງສາຍພົວພັນການທູດລະຫວ່າງ 2 ປະເທດ.

ພັກ-ລັດ ແລະ ປະຊາຊົນລາວທັງໝົດ ໄດ້ໃຫ້ຄວາມສຳຄັນຢ່າງຍິ່ງຕໍ່ການພົວພັນ ແລະ ການຮ່ວມມືກັບຣັດເຊຍ ທີ່ຍາມໃດກໍໄດ້ໃຫ້ການຊ່ວຍເຫຼືອພວກເຮົາ ມາຢ່າງຍາວນານ.

ຊາວລາວຫລາຍພັນຄົນທີ່ໄດ້ຮັບການສຶກສາຢູ່ສະຫະພາບໂຊວຽດ ແລະ ສະຫະພັນຣັດເຊຍໄດ້ປະກອບສ່ວນເຂົ້າໃນການປົກປັກຮັກສາ ແລະ ພັດທະນາປະເທດ ຊາດຢ່າງໜັກແໜ້ນ, ມີຫຼາຍທ່ານກໍ່ໄດ້ຮັບຄວາມໄວ້ເນື້ອເຊື່ອໃຈຈາກພັກ-ລັດໃຫ້ດຳລົງຕຳເເໜ່ງທີ່ສຳຄັນໃນການຊີ້ນຳ-ນຳພາການພັດທະນາເສດຖະກິດ-ສັງຄົມຂອງປະ ເທດເຮົາ.

ລວມທັງຂ້າພະເຈົ້າເອງກໍເປັນອະດີດນັກສຶກສາຈາກ ມະຫາວິທະຍາໄລວິຈິດເຄມີ ແລະ ເຕັກໂນໂລຊີແຫ່ງລັດມົດສະກູ ຕັ້ງຊື່ຕາມທ່ານ ມ.ວ ໂລໂມໂນຊົບ (Moscow State University of Fine Chemical Technologies named after M.V. Lomonosov MITHT).

ໃນເດືອນຕຸລາ ປີ 2013, ຫຼັງຈາກຫ່າງຫາຍເປັນເວລາ 15 ປີ ຂອງສູນວິທະຍາສາດ ແລະ ວັດທະນະທຳ ຣັດເຊຍປະຈຳນະຄອນຫຼວງວຽງຈັນນັ້ນ, ໄດ້ມີການ ຟື້ນຟູຄືນໃໝ່ເຂົ້າໃນການປະກອບສ່ວນທີ່ສຳຄັນໃນການພັດທະນາການຮ່ວມມືດ້ານມະນຸດສະທຳ ແລະ ການແລກປ່ຽນດ້ານວັດທະນະທຳ. ສວວຣ ປະຈຳນະຄອນ ຫຼວງວຽງຈັນໄດ້ໃຫ້ການຊ່ວຍເຫລືອແກ່ຊາວໜຸ່ມລາວ ຜູ້ທີ່ຕ້ອງການຮັບການສຶກສາຢູ່ປະເທດຣັດເຊຍ, ສົ່ງເສີມການພັດທະນາສາຍພົວພັນທີ່ຕ່າງຝ່າຍຕ່າງມີຜົນປະ ໂຫຍດລະຫວ່າງມະຫາວິທະຍາໄລຂອງປະເທດຂອງພວກເຮົາ, ສອນຄົນລາວໃຫ້ຮູ້ພາສາລັດເຊຍ ແລະ ແນະນຳພວກເຂົາກ່ຽວກັບມໍລະດົກທາງວັດທະນະທຳຂອງປະຊາ ຊົນຣັດເຊຍ.

ທ່ານຍັງກ່າວຕື່ມອີກວ່າ: ກອງປະຊຸມໃນມື້ນີ້ຈະເປັນໂອກາດທີ່ດີສຳລັບການສື່ສານ, ເພີ່ມພູນຄວາມເຂົ້າໃຈເຊິ່ງກັນ ແລະ ກັນລະຫວ່າງອະດີດນັກສຶກສາຈາກ ປະເທດຕ່າງໆ, ປະກອບສ່ວນເຂົ້າໃນການສົ່ງເສີມ ແລະ ການພັດທະນາສາຍພົວພັນ ແລະ ການຮ່ວມມືລະຫວ່າງປະເທດຂອງພວກເຮົາ, ທີ່ເຊິ່ງອະດີດນັກສຶກສາຈາກສະ ຫະພາບໂຊວຽດ ແລະ ສະຫະພັນຣັດເຊຍເຮັດວຽກເພື່ອເປັນປະໂຫຍດໃຫ້ແກ່ມິດຕະພາບ ແລະ ການຮ່ວມມືຂອງພວກເຮົາ.

ໃນໂອກາດດັ່ງກ່າວ, ຍັງໄດ້ມີພິທີມອບຫລຽນກາມິດຕະພາບ ຈຳນວນ 3 ທ່ານ ແລະ ໃບຍໍຍ້ອງ ຈຳນວນ 5 ທ່ານ, ໃຫ້ກຽດມອບໂດຍທ່ານ ອາເລັກຊານດຣ໌ ຣາດກົບ, ຮອງຜູ້ອຳນວຍການອົງການຮ່ວມມືແຫ່ງຣັດເຊຍ.

060061062063064065066068069070071072073074075076077078079080