Alternative flash content

To view this Flash you need Javascript on your browser and updated version of flash player.

Get Adobe Flash player

ແນະນຳ ກ.ວ.ຕ (MOST)

ລົງທະບຽນຜູ້ໃຊ້

Home ຂ່າວສານ ຂ່າສານ ການເຄື່ອນໄຫວວຽກງານຕ່າງໆ ເປີດງານມະຫະກຳຊັບ ສິນທາງປັນຍາ ທີ່ນະຄອນປາກເຊ ແຂວງ ຈຳປາສັກ

ເປີດງານມະຫະກຳຊັບ ສິນທາງປັນຍາ ທີ່ນະຄອນປາກເຊ ແຂວງ ຈຳປາສັກ

355ໃນຕອນແລງວັນທີ 25 ເມສາ 2019 ທີ່ ນະຄອນ ປາກເຊ, ແຂວງຈໍາປາສັກ, ກົມຊັບສິນທາງປັນຍາ, ກະຊວງ

ວິທະຍາສາດ ແລະ ເຕັກໂນໂລຊີ(ກວຕ) ຮ່ວມກັບພະແນກ ວິທະຍາສາດ ແລະ ເຕັກໂນໂລຊີ ແຂວງ ຈຳປາສັກ ໄດ້ເປີດ ງານມະຫະກໍາຊັບສິນທາງປັນຍາ ຂຶ້ນຢ່າງເປັນທາງການ ໂດຍໃຫ້ກຽດເຂົ້າຮ່ວມງານດັ່ງກ່າວ ມີທ່ານ ບົວສອນ ວົງສອນຄອນ, ຮອງເຈົ້າແຂວງ ແຂວງຈຳປາສັກ; ທ່ານ ສຸລິອຸ ດົງ ສູນດາລາ, ຮອງລັດຖະມົນຕີ ກວຕ, ບັນດາທ່ານຮອງເຈົ້າແຂວງ ແຂວງເຊກອງ, ແຂວງອັດຕະປື, ບັນດາທຸຕານຸທູດ, ຜູ້ຕ່າງໜ້າຈາກອົງການຊັບສິນ ທາງປັນຍາໂລກ, ບັນດາທ່ານຫົວໜ້າ, ຮອງຫົວໜ້າຫ້ອງການ, ກົມ, ສະຖາບັນ, ຫົວໜ້າພະແນກ, ຮອງພະແນກ, ຜູ້ຕາງໜ້າຈາກພະແນກການອ້ອມຂ້າງແຂວງ, ຜູ້ປະກອບການ ທັງພາຍໃນ ແລະ ຕ່າງປະເທດ, ພະນັກງານວິຊາ ການທັງສູນກາງ ແລະ ທ້ອງຖີ່ນ.

ໂອກາດນີ້, ທ່ານ ບົວສອນ ວົງສອນຄອນ, ຮອງເຈົ້າແຂວງ ແຂວງຈຳປາສັກ ໃຫ້ກຽດກ່າວເປີດງານ ມະຫະກຳຊັບສິນທາງປັນຍາຢ່າງເປັນທາງການວ່າ: ງານມະຫາກຳຊັບສິນທາງປັນຍາ 2019 ນີ້ ມີບັນດາກິດຈະ ກຳ ແລະ ໂຄສະນາເຜີຍແຜ່ຄວາມຮັບຮູ້ທາງດ້ານຊັບສິນທາງປັນຍາ ເພື່ອຍົກໃຫ້ເຫັນຄວາມສຳຄັນຂອງວຽກງານຊັບສິນທາງປັນຍາ ເຂົ້າໃນການພັດທະນາເສດຖະກິດ-ສັງ ຄົມ ແລະ ວັດທະນະທຳ ຊຶ່ງເຮັດໃຫ້ມວນຊົນ ໂດຍສະເພາະ ແມ່ນນັກຄົ້ນຄວ້າ, ນັກວິທະຍາສາດ, ນັກປະດິດສ້າງ, ນັກປະດິດຄິດແຕ່ງ, ນັກຮຽນຮູ້-ນັກສຶກສາ ໄດ້ຮັບຮູ້ຂໍ້ມູນຂ່າວສານ ກ່ຽວກັບວຽກງານຄຸ້ມຄອງ ແລະ ການປົກປ້ອງຊັບສິນທາງປັນຍາ ເຊັ່ນ: ສິດທິບັດ, ອະນຸສິດທິບັດ, ແບບອຸດສາຫະກຳ, ແບບຜັງວົງຈອນລວມ, ເຄື່ອງໝາຍການຄ້າ, ຖິ່ນກໍາເນີດ, ພັນພືດໃໝ່, ລິຂະສິດ ແລະ ສິດກ່ຽວຂ້ອງກັບລິຂະສິດ ແລະ ພູມປັນຍາພື້ນບ້ານອັນເປັນມູນເຊື້ອ ໃນການພັດທະນາເສດຖະກິດ-ສັງຄົມ ແລະ ວັດທະນະທຳ.

ພ້ອມກັນນີ້ ຍັງເປັນການສະແດງເຖິງ ການເຄົາລົບສິດ, ການປົກປ້ອງສິດ ແລະ ການປົກປ້ອງຜົນປະໂຫຍດຂອງນັກຄົ້ນຄວ້າ, ນັກປະດິດສ້າງ ແລະ ນັກປະ ດິດແຕ່ງ ເພື່ອຊຸກຍູ້ສົ່ງເສີມຄວາມຄິດຂອງມວນມະນຸດ.

ໃນໄລຍະຜ່ານມາ ຢູ່ຂັ້ນສູນກາງ, ກົມຊັບສິນທາງປັນຍາ ໄດ້ເຂົ້າຮ່ວມການເຄື່ອນໄຫວນໍາບັນດາອົງ ການຊັບສິນທາງປັນຍາຂອງສາກົນຢ່າງຕັ້ງໜ້າ ເຊັ່ນ: ໜ່ວຍ ງານຊັບສິນທາງປັນຍາອາຊຽນ, ສົນທິສັນຍາ ປາຣີ, ສົນທິສັນຍາວ່າດ້ວຍການຮ່ວມດ້ານສິດທິ ບັດ, ສົນທິສັນຍາເບີນ, ອະນຸສັນຍາມາດຣິດ.

ຂະນະດຽວກັນ ຢູ່ຂັ້ນທ້ອງຖິ່ນ ໄດ້ເອົາໃຈໃສ່ຈັດຕັ້ງປະຕິບັດໜ້າທີ່ວຽກຕາມການແບ່ງຂັ້ນຄຸ້ມຄອງ ລະຫວ່າງ ສູນກາງ ແລະ ທ້ອງຖິ່ນ ໄດ້ດີຕະຫຼອດມາ.

ຄຽງຄູ່ກັບການເຄື່ອນໄຫວໃນເວທີສາກົນ ດັ່ງທີ່ໄດ້ກ່າວມາຂ້າງເທິງນັ້ນ, ກົມຊັບສິນທາງປັນຍາ, ກວຕ ໄດ້ສົມທົບກັນຢ່າງກົມກຽວກັບພະແນກວິທະຍາສາດ ແລະ ເຕັກໂນໂລຊີ ແຂວງ ຈຳປາສັກ ຊຶ່ງໄດ້ມີການຈັດແບ່ງວຽກແບ່ງຄວາມຮັບຜິດຊອບກັນຢ່າງລະອຽດໃນການລົງຮາກຖານ ເພື່ອສ້າງຄວາມເຂົ້າໃຈ ແລະ ຄວາມເຂັ້ມແຂງ ທາງດ້ານວິຊາການໃຫ້ແກ່ພະນັກງານທ້ອງຖິ່ນ, ຜູ້ປະກອບການຂະໜາດນ້ອຍ ແລະ ກາງ (SME), ນັກທຸລະກິດ, ກຸ່ມຜູ້ຜະລິດ, ຊາວກະສິກອນ ເຫັນໄດ້ຄວາມສຳຄັນ ຂອງວຽກງານຊັບສິນທາງປັນຍາ ເຂົ້າສູ່ຂະບວນການຜະລິດເປັນສິນຄ້າ ພາຍໃຕ້ຄຳຂວັນທີ່ວ່າ “ໜຶ່ງຜະລິດຕະພັນ ໜຶ່ງຊັບສິນທາງປັນຍາ” ແລະ ເພື່ອປະຕິບັດມະຕິ 03/ກກມ ຂອງກົມການເມືອງສູນກາງພັກ ກ່ຽວກັບວຽກງານສາມສ້າງ ໃນການເຄື່ອນໄຫວຈັດຕັ້ງຄຸ້ມຄອງວຽກງານຊັບສິນທາງປັນຍາ ແຕ່ສູນກາງລົງຮອດທ້ອງຖິ່ນ, ປະສານ ງານເພື່ອໂຄສະນາເຜີຍແຜ່, ຊຸກຍູ້ສົ່ງເສີມໃຫ້ເກີດມີຫົວຄິດປະດິດສ້າງ, ຫົວຄິດປະດິດແຕ່ງ, ສ້າງຈິດສຳນຶກໃນການນັບຖືສິດຂອງເຈົ້າຂອງຜົນງານ ແລະ ເຄື່ອນໄຫວໃນ ການບັງຄັບປະຕິບັດສິດຊັບສິນທາງປັນຍາ.

ສະເພາະ ແຂວງຈຳປາສັກ ໃນໄລຍະຜ່ານມາ ໄດ້ເອົາໃຈໃສ່ບໍລິການດ້ານຊັບສິນທາງປັນຍາໃຫ້ແກ່ສັງຄົມ ເຊັ່ນ: ໃຫ້ຄຳປຶກສາ ແລະ ຮັບຄຳຮ້ອງຂໍຈົດທະບຽນ ເຄື່ອງໝາຍການຄ້າຫຼາຍກວ່າ 15 ສະບັບ, ໄດ້ເປັນເຈົ້າການຮ່ວມກັບພາກສ່ວນທີ່ກ່ຽວຂ້ອງຂັ້ນສູນກາງ ແລະ ຂັ້ນທ້ອງຖິ່ນ ໃນການປົກປ້ອງສິດຂອງເຈົ້າຂອງຊັບສິນທາງ ປັນຍາ ແລະ ນຳໃຊ້ມາດຕະການຕໍ່ຜູ້ລະເມີດ 15 ກໍລະນີ.

ການເຄື່ອນໄຫວທີ່ກ່າວມານີ້ ໄດ້ເປັນສ່ວນໜຶ່ງໃນການປົກປ້ອງ ແລະ ສ້າງຄວາມຍຸຕິທຳ ກ່ຽວກັບຊັບສິນທາງປັນຍາ ແລະ ເປັນການປະກອບສ່ວນໃນການ ພັດທະນາເສດຖະກິດ-ສັງຄົມ ແລະ ເຮັດໃຫ້ມີຄວາມຍຸຕິທຳໃນສັງຄົມ.

ໃນໄລຍະງານມະຫາກຳຊັບສິນທາງປັນຍານີ້, ກົມຊັບສິນທາງປັນຍາ, ກວຕ ໂດຍສົມທົບກັບ ແຂວງຈຳປາສັກ ຈະໄດ້ບໍລິການໃຫ້ຄຳປຶກສາ, ຈັດກອງປະຊຸມ ເຜີຍແຜ່ວຽກງານຊັບສິນທາງປັນຍາ, ແນະ ນຳກ່ຽວກັບ ການຈົດທະບຽນຊັບສິນອຸດສາຫະກຳ ແລະ ການແຈ້ງຂໍມູນລິຂະສິດ ແລະ ສິດກ່ຽວຂ້ອງກັບລິຂະສິດ, ບໍລິ ການຮັບຄຳຮ້ອງຂໍຈົດທະບຽນດ້ານຕ່າງໆທີ່ກ່ຽວຂ້ອງ.

ພິເສດ ຈະມີກິດຈະກຳແຂ່ງຂັນກິລາບານເຕະ ຊິງຂັນທ່ານເຈົ້າແຂວງ-ແຂວງຈຳປາສັກ ພາຍໃຕ້ຄຳຂວັນທີ່ວ່າ “ຊັບສິນທາງປັນຍາ ແລະ ກິລາ ກ້າວຂຶ້ນສູ່ຫຼຽນຄຳ”.

ນອກຈາກນີ້ ຈະໄດ້ມີພິທີຮັບຄໍາຮ້ອງຂໍຈົດທະບຽນຖິ່ນກໍາເນີດກາເຟບໍລະເວນຂອງສະມາຄົມສົ່ງ ເສີມຖີ່ນກຳເນີດກາເຟບໍລະເວນ ແລະ ມອບໃບຢັ້ງຢືນຖິ່ນກຳ ເນີດແຊມເປນໃຫ້ແກ່ ບໍລີສັດແຊມເປນ, ທ່ານຮອງເຈົ້າແຂວງຍັງໄດ້ກ່າວຕື່ມອີກວ່າ: ງານມະຫາກຳຊັບສິນທາງປັນຍາ 2019 ຄັ້ງນີ້ ຈະເປັນເວທີອັນສຳຄັນ ເພື່ອຊຸກຍູ້ສົ່ງເສີມວຽກງານຊັບສິນທາງ ປັນຍາຂອງແຂວງພວກເຮົາ ກໍຄື ຂອງປະເທດເຮົາ ໃນການພັດທະນາເສດຖະກິດ-ສັງຄົມ ແລະ ວັດທະນະທຳ ເພື່ອຫັນປະເທດເຮົາໃຫ້ເປັນອຸດສາຫະກຳ ແລະ ທັນສະໄຫມ ເທື່ອລະກ້າວ, ເພື່ອແກ້ໄຂ ແລະ ຫຼຸດຜ່ອນຄວາມທຸກຍາກ ຂອງປະຊາຊົນບັນດາເຜົ່າ ຕາມຄຳຂວັນທີ່ວ່າ “ສົ່ງເສີມຊັບສິນທາງປັນຍາ ເພື່ອພັດທະນາເສດຖະກິດ-ສັງຄົົມ ແລະ ວັດທະນະທຳແບບຍືນຍົງ”.

ໂອກາດນີ້, ທ່ານ ບົວສອນ ວົງສອນຄອນ, ຮອງເຈົ້າແຂວງ ແຂວງຈຳປາສັກ ແລະ ທ່ານ ສຸລິອຸດົງ ສູນດາລາ, ຮອງລັດທະມົນຕີ ກວຕ ໃຫ້ກຽດຂຶ້ນຕັດແຖບຜ້າ ແລະ ຕີຄ້ອງ 9 ບາດ ເພື່ອເປີດງານມະຫາກຳຊັບສິນທາງປັນຍາຢ່າງເປັນທາງການ ແລະ ຢ້ຽມຊົມການວາງສະແດງສິນຄ້າໃນງານດັ່ງກ່າວ.

ໃນເວລາຕໍ່ມາ ໄດ້ມີພິທີມອບໃບກຽດຕິຄຸນ ໃຫ້ແກ່ບັນດາຕົວແທນ ແລະ ບໍລິສັດທີ່ໃຫ້ການອຸ ປະຖຳໃນການຈັດງານມະຫາກຳຊັບສິນທາງປັນຍາ ແລະ ສະເຫຼີມສະຫຼອງວັນຊັບສິນທາງປັນຍາໂລກ ແລະ ໃນຄໍ່າຄືນຕະຫຼອດການຈັດງານຄັ້ງນີ້ ມີການສະແດງສີລະປະພື້ນເມືອງລາວອີກດ້ວຍ.

ຂ່າວ ແລະ ຮູບພາບ: ບາລະຄອນ ສຸວັນນະພາສີ


356357358359360361362363364365366